Julor lai tylli ki kali, ha ka jing ia kynad hynnin ha Ichamati, ong ki pulit

Shillong: Ki pulit jong ka East Khasi Hills, ha ka kyrwoh hynnin ka miet, ki iathuh ba ka KSU, ka la pynlong jingialang hynnin ha ka por 3baje nohsngi ha Ichamati bad mar ia wai ka jingialang, ka la mih ka jing ia ktah kti hapdeng ki dkhot ka KSU bad ki bar Jylla ha katei ka thain.

Katei ka jing ia kynad, ka la ialam sha ka jingthang ia u skum kba, uba don ha katei ka jaka bad ki don ruh ki dkhot ka KSU, kiba mut ban thang ia kawei ka iing. Hangta ka la mih ka jing ialeh pyrshah jong ki bar Jylla bad ki la lun maw ia kawei ka bos, kaba kit ia ki dkhot jong ka KSU.

Ka don ruh kawei ka taksi, kaba leit shaw ia ki nongialam jong ka KSU na Ichamati kaba la julor bad ka kali jong ka kong J Umdor, MCS ruh ka la julor ha katei ka jingjia.

Saw ngut ki dkhot jong ka KSU, ki la mynsaw bad la phah sumar ia kitei ha ka PHC ha Ichamati bad sa arngut ha Sohra PHC. La iathuh ba U Bah Lurshai Hynniewta (35), uba dei u khun jong U Bah Serkin Nongkynrih, uba na Khliehshnong, Sohra, ula khlad noh ha ka jingshah sumar.