U pud u sam hapdeng ka Jaintia Hills bad ka Karbi Anglong, ka Block I, Block II, ki bynta ka Ri Jaintia

M.M.Thaiang

Bun ki paralok bad kum juh na ka Sengbhalang kiba wad jingtip shaphang
“U PUD U SAM HAPDENG KA JAINTIA HILLS MEGHALAYA BAD KA MIKIR HILLS (KARBI_ANGLONG) ASSAM” ba yn tip ia ka jingshisha ha ka jingiadei u pud u sam hapdeng ka Jaintia Hills District Meghalaya bad ka Mikir Hills Assam, kaba la tip mynta Karbi-Anglong District Assam).Nga thoh ia kane ka jingthoh kumba ka long.

Ha ka snem 1950,ka Sorkar Assam ka la pynmih hukum ban thaw sa kawei ka District bathymmai hapoh jong ka. Ha ka snem 1950 bad kat kum ka Notification No.TAD/R/31/50 dated 3.10.1950 ba ka la thung ia ka Commission ban tohkit halor ka jingthmu ban shim ne kdiahnoh ia ki katto katne ki jaka na ka District Khasi bad Jaintia Hills bad ban shna ne thaw ia ka District Mikiir bad North Cachar Hills.

Kane ka Commission kaba don hynriew (6) ngut ki dkhot bad uwei u long u ma Larsing Khyriem MLA ka Rilum Jaintia ban tohkit bad report shaphang kane ka jingthmu bad ban shim noh ia ki ar tylli ki bynta jong ka Rilum Jaintia (Jowai Sub-Division ha kata ka por) kata ia ka thain Labang-Nongphyllut, Elaka u Doloi Nongphyllut, ia ka thain Pangam-raliang, Elaka u Doloi Raliang,Mooliar Umlaphiah, Elaka u Doloi Shiliangmyntang, ka thain Khanduli, Elaka u Doloi Shiliangmyntang ia kaba ki briew ki k ham iatip mynta kum ka Block I bad ia kawei pat ka thain Nongtung-Khyrwang, Elaka u Doloi Nartiang ia kaba ki briew ki kham iatip mynta kum ka Block II.

Haba peit na ki Dulir( Records) kane ka Commission ka la ia kynduh bun bun sien ban ia pyrkhat halor kane ka kam bad la don ka jingiatainia kaba jur hapdeng jong ki halor ka jingthmu ban wengnoh ia ka thain Block I bad thain Block II na ka Jowai Sub-Division bad ban pyniasoh ia ki sha ka District Mikir Hills( Karbi-Anglong ba mynta). Kane ka Commission ka la shim sakhi ruh na ki paidbah Mikir (Karbi), hynrei pat ym shym la shim sakhi na ki Pnar na ki Khasi kiba shong ha ka thain Labang-Nongphyllut Pangam-raliang, Nangtung, ki Khyrwang kiba dei ki trai shnong trai muluk jong kine ki artylli ki Block(BlockI & Block II). Ka Sorkar Assam ka la ioh ia ka jingujor na ki trai shnong jong kine ki artylli ki Block ia kane ka jingthmu jong ka ban kdiah jubor na ka Rilum Khasi bad Jaintia bad ym shym la khot ia ki ban ai sakhi.
U ma Larsing Khyriem MLA, u la pyrshah jur ia kane ka jingthmu jong ka Sorkar Assam ban kdiah ia kine ki Block na ka Rilum Khasi bad Jaintia pynban ka sur jong u marwei hapdeng ki hynriew (6) ngut ki dkhot ka Commission ka la shu long kum ka jingpyrta ha Rikhlaw bad ka Commission ka la rai bad recommend sha ka sorkar Assam ban wengnoh ia kine ki artylli ki Block na ka Jowai Sub-Division bad pyniasoh jubor ia ki sha Mikir Hills District( Karbi-Anglong ba mynta).
Halor kane ka rai u ma Larsing Khyriem u la pynpaw madan ia ka jingpyrshah jong u da kaba ai ia ka jingthoh ujor “ NOTE OF DISSENT”
Ka Sorkar Assam wat lada ka la ioh ia ki jingthoh ujor na ki trai shnong trai muluk jong ka thain Block I bad Block II bad ka jingthoh ujor jong u ma Larsing Khyriem MLA kam shym la shah skhor eiei bad ha ka snem 1951, ka la pynmih hukum ba ka la pdiang ia katai ka recommendation jong ka Commission kat kum ka Notification No.TAD/R/31/50/148 dated 13 April 1951 ba la wengnoh ia ka Block I bad Block II na ka United Khasi& Jaintia Hills.
Ban pynskhem shuh shuh ka Sorkar Assam ka la pynmih sa kawei ka hukum Notification No.TAD/R/31//50/149 ba la pyniasoh noh ia ka Block I bad Block II sha ka Mikir Hills District bad ia u Pud u Sam jong ka Mikir Hills District la pynbna kat kum ka hukum sorkar Notification No.TAD/R/31/50/151 dated 13.4.1951.
Shen hadien kane ka hukum ka la mih ka jingiakhih bad jingpyrshah kaba jur ia kane ka jingleh thombor bad ka jingleh bym khein briew jong ka Sorkar Assam da ki paidbah trai shnong trai muluk jong ka Block I bad Block II bad bun ki Nongialam bad ki riewkhmat jong ka thain Labang-Nongphyllut bad Pangam-Raliang kum ki jong u ma Trod Thaiang, ma Johny Lyngdoh, ma Sbut Larom (Lamin), ma Bulet Lekhaden, ma Elevon Lyngdoh Nongsubi, ma Muhon Lamare, ma Sah Khyrwang, ma Bung Tamaha bad kiwei ki la shah kem bad set ia ki sha Baithalangso bad Nowgong Jail,pynban kine ki Rangbah kim shym la pyndem ialade bad katba kine ki dangsah hapoh Jail, ka jingiakhih pat ka la nangjur nangjur hapoh ka jingialam jong ki khun Samla shynrang bad Kynthei jong ka thain Block I.
Ka Sorkar Assam haba ka la iohi ia kane ka jingiakhih kaba katba nangmih ka sngi ka la nangjur kam banse ban ai hukum ban ia pyrkhat biang ( Re-examine) ia u pud ka Jaintia Hills uba iadei bad ka Block I bad ka la pynmih ia ka hukum Notification No. RSR/296/51/130 dated 13.3.1957 da kaba khot ia ka jingujor bad ka jingmut kaba thymmai bad ka la kubur ba ka la leh bakla ban shu pyniasoh jubor ia kine ki Block hapdeng ka jingujor bad jingbym mynjur jong ki trai muluk ki trai jaka jong ka Block I bad Block II.

Yn dang bteng