Pyrdet ka thoh Khasi

Bah RM Shabong

Kane ka dei ka juk jong ka social media bad ka bor jongka, ka trei kam kham jur ban ia ki kamra klass ruh la imat bad ka daw ka long, ba ki don ki bym ju nang ban thoh ban pule, hynrei mynta ki la sdang ban duriap ban thoh dak malu mala, na ka bynta ban ioh ia chat paralok shane shatai bad nangta don pat sa kito kiba la shah hikai bha ia u abkd, hynrei ki la pynkylla noh ia katei ka ain jong ka thoh ka pule bad ki ia thoh mata ma dei, tang ban pynsngew thuh jubor ia kito kiba ki ia chat.

Ka jing lymmuh jong ka thoh ka tar ha kine ki sngi, ka la iaid sha palat ki social media bad kane ka la pur sha ka rukom thoh, haba ai kot khubor bad shisien ba ka la rung ha ki kotkhubor, ka la rung ne kan sa rung ha ki kamra klas ruh bad katei ka dei ka daw jong ka jing kyrkieh bad katei ka kylla long ka jingmlien ban thoh tangdep bad ka sa pynmlien ia ka jabieng ba kan im ha katei ka dur.

Kaba shah ktah eh ha kine ki sngi, ka dei ia ka rukom thoh ha ka ktien Khasi, ha kaba lada ngi spel ialehkai, ki la don kiba buh da ki kyntien yalehkai bad nangta, lada ong ieid, ki la thoh “8” bad kam dei tang kata, hynrei ki don sa haba ki thoh ia ka kyrteng jong ka jaka, lada ki thoh Shillong, kin thoh sHillong bad kumta ter ter bad kane ka dei ka ain jong ka juk social media, kaba la pyn kulmar hi thlim ia ka thoh ka tar ha kine ki sngi. Haduh mynta ka kyndon jong ka thoh ka tar, lane ka grammar jong ka thoh ka tar kam pat don bad kumta, ngim lah ban khmih lynti mano ban shimti ban pynbeit ia katei ka jing kylla pyrdet ka rukom thoh bad lehse, lada ka don ka lad, la imat, ka dei ia ki skul, ba kin iai pynkynmaw ha ki kamra klass jongki, ia ki dak heh bad ki dak rit lane ia ki abkd bad ha kino ki bynta jong ka senten ban pyn iapher.

Kaba pyn lyngngoh jur, ka long ba ha kine ki sngi, kum ki sengbhalang, ki sport club, ki seng niam bad kiwei de ki seng bapher, ba ki phah ia ki jingthoh jongki sha ki kotkhubor bad sha ki tnat sorkar, da katei ka rukom thoh kaba pyrdet bad haba ka long kumne, ka pyni ba kitei ki la ioh ia ka rukom pyrkhat kaba thymmai ha ka rukom spel dak, ha ka rukom buh kyntien bad kumta ter ter.

To ngin kynmaw ba lada ngi ieid jaitbynriew, ngi dei ban ieid ia ka ktien bad lada ngi ieid ia ka ktien, ngi dei ban nang ia ka thoh ka tar, hynrei lada ngim nang; ngi la pynjot ia la ka ktien.