Na ka Corona, wat pynlong Trade Fair ha Shillong, ong ka HYC

Shillong: Ka Hynniewtrep Youth Council Shillong City mynta ka sngi ha poh Ka jingialam u President u samla John Lyngdoh bad u General secretary samla Enlang sawian ki la leit ban ia kynduh ia ka Deputy Commissioner jong ka East Khasi hills District ka Kong Matsiewdor War Nongbri ha kaba ia dei bad ka jingthmu ban pynlong ia ka 21st International Trade Fair hapoh Nongbah Shillong ha Madan Iewrynghep.

Kane jingleit ban kyrpad na ka liang ki HYC Shillong city ka long halor ka jingtieng ia ka jingsaphriang ka jingpang coronavirus bad ka 21st International Trade Fair ka dei ka iew kaba yn wan iashim bynta lang da ki briew na kylleng ki Ri ka pyrthei kiba kynthup ia ka Thailand,Veitnam,Bangladesh, Malaysia, Nepal Myanmar bad kiwei kiwei ki Ri ba Marjan.

Ka Seng ka sngew ba ka jingthmu ban pynlong ia kum kine ki 21st International Trade Fair ha kum kane ka por kan buh jingma ia ki nongshong Shnong ka jylla na ka khlam corona virus.

Ka seng ka lah kyntu ia ka DC ban pynsangeh bad ban ym ai jingbit ia kane ka Trade Fair lane kino kino ki Trade Fare kiba wan iashim bynta da ki briew kiba nabar, namar ka jingiada ka kham biang ban ia jingpynkoit.

Na ka liang ka DC ka kong Matsiewdor W Nongbri, ka kular sha ka seng ba yn ym ai jingbit (NOC) sha ki bor pyniaid ban pynlong ia kane ka 21st International Trade Fair.