La jan arsnem, ym iohi dak eiei halor ka skul ha Khliehumwang

Nongpoh: Naduh ka por ba ki Pulit ka Assam, ki la leit ban pynpra noh ia ka Building jong ka SSA LP School ha Khliehumwang, ka la wanrah jingeh shisha ia ka Managing Committee, ki nonghikai lem bad ki kmie ki kpa jong ki khynnah, kiba phah leit skul ha katei ka skul, namar ki hap ban shna bad maramot ia katei ka skul, ha manla ka por ba sdang ka skul.

Katkum ka jingiathuh da ki nonghikai jong katei ka skul, ki la ong ba ki shem jingeh shisha halor ka jingduna kiba don ha katei ka skul, namar naduh ka por ba ka Building jong katei ka skul ka la shah pynpra, ki la shem jingeh wat tang ka jaka ban shong ki khynnah skul bad khlem da iakren shuh haba iadei bad ka jingeh kaba ki iakynduh ha ka por Lyiur ka por slap.

Lah ruh ban kdew hangne, ba mynshem snem ka MC, ki Nonghikai bad ki Kmie ki kpa, ki hap ban shna hi ia katei ka skul bad kata ka long tang na ka bynta ban iohshong ki khynnah skul bad kaba iada tang ia ka sngi u Slap, hynrei katei ka iing kaba ki shna mynta ka jot bad kam long shuh, kaba la pynlong ruh ka MC, nonghikai ba kim banse ban shna thymmai biang da kawei, wat haba kim ioh ia kino kino ki lad jingiarap na ka sorkar.

Ka long ruh kaba sngewsih ban tip, ba tang namar ka jingbym shimkhia ka sorkar ha ka ban iarap ha ka ban maramot ia katei ka skul, ka la wanrah ruh ia ka jingduhnong kaba khraw na bynta jong kito ki khynnah kiba leit ha katei ka skul, namar nalor ba kim ioh ia ka jaka pule kaba biang, hynrei ki iakynduh ruh sa ia kawei ka jingeh bad kata ka long ba kim ioh ia ka lad ban leit skul ha ka por kaba biang.
Ban shu pynkynmaw hangne, ba ha u snem uba la dep, kitei ki khynnah kiba leit ha katei ka skul, kim ioh ia ka lad ban leit skul ha kaba por kaba biang bad ka daw hi ka long ba ym don skul bad mynta u snem ruh kajuh ka apot sha kitei ki khynnah, kata ka long ba kim ioh ban leit skul ha ka por kaba biang bad khlem da iakren shuh halor ka hok kaba kum ki khynnah skul ki dei ban ioh.
Ka long ruh kaba sngewlyngoh, ban iohsngew ia ka sur jong kitei ki Nonghikai, ha kaba wat ha katei ka khim khait kaba ki iakynduh jingeh, hynrei kim shem la kynthoh iano iano la ka long ia u MLA ne wat ia ka sorkar, lehse ka dei kaba ki la thait ban kren ne kynthoh, namar kam poi shano shano bad ym don kiba iarap, ha kaba ki hap shim ia ka jingkitkhlieh halade ban trei ia ka kam.
Ha kawei pat ka liang, ki nonghikai jong katei ka skul, ki la ai ka jingiaroh ia ka Khasi Student Umion, kaba la leit ban iarap sha katei ka skul da kaba ai sngewbha haduh 6 Ban ki tip sopiing bad lyngba jong kitei ki tin kaba la ai sngewbha da ka KSU, yn sa ioh ban tap ia katei ka skul.