Shah thalain u nongialam BJP, ba u iahap, ba ki kynthei kiba shet ja, haba poi bnai, kin kylla ksew

U nongkren jong ka seng BJP, ula shah sangeh tyngeh hynnin ka sngi, haba ula pyn iahap ia ka kynthei bad u ksew bad ym tang katta, hynrei, ula pynksan jubor ialade, da kaba u ong ba u dei u hindu ba shisha.

Katei ka jingjia, ka jia, hadien ba kawei ka kynthei, ka la pyrshah jur ia ka jingkren u sadhu ha Gujarat, ha kaba ula ong ba kito ki kynthei kiba shet ba tiew, ha ka por ba ki poi bnai, kin sa kylla ksew ialade, ha ka jingkha ba arsien jongki.

Katei ka dei na ka video jong U Swami Krushnaswarup Dasji, uba na Swaminarayan Bhuj Mandir, ha kaba u ong ba ki kynthei ha ka por ba ki dang poi bnai, lada ki shet bam ia u lok jongki, kumta ha ka jingkha ba arsien ia ki, kin sa kylla ksew.

Katei ka jingkren u lyngdoh niam, ka la pynlong ia kiba bun ki kynthei, ba kin shondur ia ki ksew bad kren kynthoh, da kaba ong ba ki dei mynshwa ki kynthei kiba la kylla ksew noh ha ka jingkha ba ar sien jongki. Ka Shunali Khullar Shroff, kaba dei ka nongthoh kot, ka shondur ia ki ar tylli ki ksew kynthei jongka, ha kaba ka ong ruh “Kine ki dei ki kynthei kiba la kylla ksew, namar ba ki la shet ja ia la ki tnga jongki, ha ka por ba ki dang poi bnai, ha ka jingim kaba mynshwa jongki”.

Halor katei ka jingthoh ka Shunali, u Gopal Krishna Agarwal, uba dei u nongkren jong ka seng BJP, ula kylli kylla, da kaba ong “Ka thew ia ka ksew kaba kumno?”.