Shillong: Ban pynkut noh ia ka huri hura ha Khasi Hills Autonomous District Council (KHADC) ki ar ngut ki MDC ka HSPDP kynthup bah Martle N Mukhim bad bah Sherborlang Mawlong, ki la kyntu ia ki nongialam ka HSPDP seng kmie ba kin iakren bad ki nong ialam kiwei ki party ba don ha ka Meghalaya Democratic Alliance (MDA) ban ailad noh ha ki MDC ka UDA ba kin ia jied hi ia u nongialam ban long CEM.
“Ma ngi kiba long ki nongmihkhmat kiba don ka jingkitkhlieh bad sngewkhia ia ka konsti twensi ba ngi mihkhmat, ka district bad ka jaitbynriew ngi la rai ban kyrpad iaphi ki nongialam jong ka party ba phin sngewbha ban wad ia ki lad ki lynti na ka bynta ban ailad ia ki MDC hapoh ka kynhun ba kin pyrkhat, kdew bad ai jingmut lang ha kaba jied ia u nongialam bad kiwei kiwei ki lad ban lah ban weng noh ia kane ka jingeh” la ong ki MDC ka HSPDP ha ka shithi ba la phah sha ka seng kmie.
Ha ka shithi, ki MDC ka HSPDP kila ong baha u bnai Lber 2019 hadien ba la pynbna ia ka kyrteng jong ki MDC kiba la shah jied ha ka elekshon 2019, ki seng sain pyrthei khlem da pynslem shuh kila ia wad ia ki lad ki lynti kumno ban ioh shna ia ka Executive Committee bad pyniaid ia ka synshar khadar ha KHADC. Bad ki seng sain hima sima kiba don ha ka shatri jong ka MDA kata ka UDP, NPP, HSPDP, PDF bad ki MDC shimet kila ioh ia ka lad ban shna ia ka Executive Committee ha KHADC. Ka HSPDP ka long kawei na kita ki kynhun iatrei synrop bad iashna ia ka parliamentary party jong ki seng synrop lang kaba ngi khot ka United Democratic Alliance (UDA).
“Kumba la tip kiba long nongialam jong kiba hap hapoh ka MDA, phi la shu pyntip ia ngi ba ia ka kam CEM la rai ba ka dei ka bhah jong ka UDP. Bad ba katkum katei ka jingiapynbeit kiba don hok ban pynmih ne pynpaw kyrteng ia u leader ne CEM ki dei tang ki MDC bad ki leader jong kiba don ha ka seng UDP. Bad kiwei pat ki MDC ne leader kiba don hapoh ka kynhun synrop kim don bynta eiei halor kane. Bad phi la bthah ia ngi ban pdiang, kohnguh bad kyrshan ia u leader/CEM ba la pynmih ne pynieng da ka UDP bad ngi kum ki MDC jong ka party ngi la pdiang, kohnguh bad leh kumba phi la bthah ia ngi ban leh”, la ong bah Sherborlang.
U la ong ba hadien ba la shimti ia ka jingsynshar ha KHADC bad hapoh kane ka jingpynbeit, la bat ia ka synshar khadar tang hapoh kumba khyndai bnai tam eiei ne duna. “Ba phin tip, hapoh kine ki Khyndai bnai ngi la mad bad iakynduh shibun ki jingeh kiba ngim dei ban iakynduh hynrei watla katta ruh na ka bynta ka bit ka biang lang, ha ka Executive Committee, ka Council, ka district bad ka jylla hi baroh kawei, ngi pdiang bad iai shah ia kine kiei kiei baroh bad ngi bteng beit ban iatreilang kumba la bthah”, la ong ka shithi.
Hynrei kaba sngewsih ka long ba tang hadien katto katne bnai, ki mih ki jingeh ki kynrum kynram ki bym ai lad satia ia ki MDC ban trei bad duriap ha la kajong ka kam ba la bynshet, haduh ba katto katne ngut napdeng ki MDC ka UDA, kila mih bad weng syndon ialade ban iatreilang bad nangta ioh lad sa ki bor ba nabar bad ka kynhun ka la sah noh ha ka kynhun rit paid bad ka Executive Committee kala hap.
Hadien ka jingkyllon noh jong ka Executive Committee kaba la jia ha ka 20-11-2019, bad hadien jong kane, kila iatreilang buit bad bor na ka bynta ban ioh biang ia ka jingbun paid na ka bynta ban shna biang ia ka Executive Committee ha KHADC. Hynrei haduh mynta ka sngi, kaba la dap kumba lai bnai duna, ym shym la poi shaei shaei ruh. “Ngim tip balei ka long kumne?. Ka lah ban long ba ka lynti iaid jong ngi ka long ka bym biang ne ka lah ban long ka jingrit mynsiem ne kiwei kiwei pat ki daw. Ngi dei ban iatrei bad wad ia ki lad ki lynti na ka bynta kumno ban lah ban weng ia kine ki jingeh”, la ong bah Sherborlang.
U la.ong ba kane ka jingjia ka la wanrah ka jingduh ka jingjulor bad ka jingjot kaba shyrkhei, ia ki nongmihkhmat, ia ki nongialam, ki konstitwensi, ka Council, ka district bad ka jylla ruh kumjuh bad ka wanrah ruh ia ka jing ia isih bad tharai sniew iwei ia iwei pat etc.
Halor jong kitei ki daw, ka emergent parliamentary party meeting jong ki MDC ka HSPDP hadien ba la iakren iathir bad tai sani halor kane ka phang, ngi sngew ba ka daw jong kane ka jingjia baroh ka lah ban long na ka daw jong ka jingbym ailad ia ki MDC hapoh jong ka kynhun ban pyrkhat ban jied ne thung ia u briew ba ibit bad idei ban long u nongialam jongki.
Phi don ban ong eiei?