Dang step pynbthei bom ki runar ha ka karkhana ha Nonglangpar Shallang

Nongstoiñ: Mynta ka step ha kapor kumba 1.30 baje ei ei mynstep ki runar ki bym shymla lah satia ban ithuh dur khmat kila leit ban pynbthei bom ia kawei ka karkhana Coke Factory kaba don hapoh ka shnong Nonglangpar jong ka thaiñ Shallang West Khasi Hills District.

Katkum ka tyllong khubor na ki pulit ka District la iathuh ruh ba ki runar hadien ba kila pynbthei bom ha katei ka jaka, kila pynpait ruh ia ka iit kali jong kawei ka truck kaba dang ieng ha katei ka jaka bad pynjot ruh ia ka windshield jong katei ka truck.

Shuh shuh ki tyllong khubor na ki pulit ki iathuh ruh ba u bom ba la pynbthei da kitei ki runar u dei uba duna ka jingkhlain, kumta kam shym la don kano kano ka jingjot ha katei ka karkhana bad kam shym la don ruh kano kano ka jingmynsaw briew.

Hadien katei ka jingjia na ka liang jong ki pulit ka Shallang Police Station kil hiar sha katei ka jaka ban pynlong ia ka jingtohkit ba bniah bad ban thwet ruh ia kito kiba donkti ban leh ia katei ka kam kaba la pyntieng pynsmiej ruh ia u paidbah katei ka thaiñ.