Shillong:Ka seng Hynniewtrep National Liberation Council (HNLC), mynta ka sngi lyngba ka kyrwoh ba la phah da u general secretary ka seng Sainkupar Nongtraw ka la kam ba ka HNLC ka donkti ban pynbthei bom IED ha ka karkhana shet ‘Koke’ ha Kyllon Mathei Pyndeng Jalong jong ka West Khasi Hills District.
U nongialam ka seng kieng atiar ka HNLC u la ong ba ka daw ba ka seng kan shim ia kane ka sienjam ka long namar ba ki kharkhana shet Koke ha katei ka thain ki dei kiba shu leh benami ha ka jingiatrei lang bad ki briew kiba don ha ka sain pyrthei bad ki nongkhaii.
U Sainkupar Nongtraw u la kam ruh bad baroh ki nongtrei ha kine ki kharkhana ki dei ki bar jylla suda bad kane ka la pynduh kamai ja kpoh ia ki trai shnong ha ka thain.U nongialam jong ka HNLC u la maham ruh ia ki nongialam seng sain pyrthei ba ki kiar na ka bamsap ne kam beain.
U Sainkupar Nongtraw u la ong ba ka jingpynbthei bom ha Riangdo ka long tang ka jingsdang bad u la kynnoh ba ka ioh ka kot jong ka jylla kala hiar naduh ki por ba synshar da ka sorkar congress bad kum juh ruh ha kane ka juk ba synshar da ka sorkar MDA. U nong ialam ka seng kieng atiar u la kam ba ka HNLC ha ki por mynshwa ka la buh bom ruh ha nongbah Shillong ha Jhalupara bad ha Jaintia Hills da ka jing thmu ban pynpaw sha ki bor ka sorkar ban kam dei ban pynsmiej ne pyn tieng ia ka seng HNLC.
Phi don ban ong eiei?