Shillong: Hadien ba ki pulit Assam ki la wan hiar sha thain Langpih, West Khasi Hills District ha ka sngi Balang, da ka jingthmu ban wan buh ia ka ktem pulit ha kawei na ki jaka harud jong ka wah Umlon kaba hap hapoh ka shnong Umwali hynrei katei ka jingthmu jong ka Assam kala pulom noh hadien ba ki nong shong shnong ka tei ka thain ha ryngkat ki pulit bad ki bor District ka West Khasi Hills ki la leit ban tuklar ban khang pyrshah ia kane ka jingthmu jong ki .
Na ka liang U Deputy Commissioner jong ka West Khasi hills District, u bah T Lyngwa mynta ka sngi haba iakren bad ki lad pathai khubor u la iathuh ba ka jingjia ha Umwali, thain Langpih kala jai jai bad kam shym don kano kano ka jingjia ba sngewsih.
Ha ba la kylli na u DC ba ka sorkar Assam ka la pyntip ne em sha ki bor jong ka District halor kane ka jingthmu ban wan shna ia ka kten pulit ha katei ka jaka na ka liang jong u Deputy Commissioner u la ong “Em ki khlem pyntip ei ei”.
Ban pynkynmaw ba ha u snem 2010 ka sorkar Assam bad ka sorkar Meghalaya ka la don ka jingiateh kular ba ha ki jaka kiba dang don ka jingiakam mar kylliang ha khappud lada don kano kano ka jingtei dei ban da ia pyntip mar kylliang.
Ha ka 19 tarik u Rymphang 2020 ia ka jingthmu jong ka sorkar Assam ban wan buh ia katei ka jaka sah jong ki pulit, ki nongshong shnong ka shnong Umwali ia ki la dep ban ioh ruh ia ka jingtip lyngba u trai jong ka wei ka kper kaba don harud jong ka wah Umlon bad u la iathuh ha ka Dorbar ka shnong Umwali ba ki don ki briew ki bym dei ki khasi ha kine ki sngi ba la lah ki la leit ban shondur bad thew ia ka kper jong u, da kaba ong ban shna ia kata ka camp bad lyngba u Nepali u la leit iathuh ia u trai jong katei ka kper ba ki tei ki briew kiba wan thew ia katei ka jaka ki phah ap ia u ha ka 19 tarik mynta u bnai.
Kumta ki paidbah katei ka shnong ha ka sngi balang 19 tarik rymphang 2020 myn hynnin ka sngi, ki la ap paidbah ia katei ka jingwan jong kitei ki briew ka Assam.
Ki long kmie ha kane ka thain ki la mih ban pynpaw pyrshah ia kane ka jingleh donbor jong ki pulit Assam ban knieh jubor bad ki la pom jubor iaki dieng ha katei ka jaka ban shna ia ka ktem pulit.
Na ka liang ki bor district ka WKH ha ryngkat ki pulit hadien ba ki la ioh jingtip mar mar ki la hiar sha katei ka jaka bad dei ha ki por 12.30 nohsngi, ha kaba ka la don ruh ka thma ktien kaba jur hapdeng ki pulit Assam bad pulit Meghalaya bad hadien kane na ka liang ki pulit Assam kim banse ban leit phai noh katba ki pulit ka Meghalaya pat haduh mynta ki dang don sah ha katei ka jaka ban synran lang ia u paidbah bad ban khang lad ia katei ka jingthmu ba rieh jong ki pulit Assam ban thaw ia katei ka ktem pulit khlem da don ka jingia pyntip ne ia sngewthuh jingmut na ki ar jylla.
Ki paidbah nongshnong shnong bad ki dkhot jong ka HYC ha ryngkat ki pulit mynnin ka miet ki la ap miet baroh shimiet ha katei ka jaka hadien ba ki la dep beh ia ki pulit Assam bad khang lad ban shna ia ka ktem Pulit.
Phi don ban ong eiei?