Nongpoh: Ka jingsniew ka surok na Umsning-Mawhati bad shaduh Umsiang, kam shem la wanrah jingeh tang ia ki paidbah bad ia ki nongniah kali kiba pyndonkam ia katei ka surok, hynrei kaba kham sngewsih ka long ba ka jingsniew katei ka surok, ka la wanrah jingeh wat ia ki khynnah skul kiba beh na iing sha Umsning, namar bun na ki khynnah skul kim poi biang por shuh sha ki skul kaba ki leit ha ki skul kiba don ha Umsning.
Halor ka jingsniew katei ka surok, la slem bah ba ki paidbah bad ki nongniah kali kiba pyndonkam ia katei ka surok, ki la iai ud bad kiba la angnud eh ban ioh ia ka surok kaba biang, na ka bynta ban suk ha ka leit ka wan, hynrei mynta pat la iohsngew sa ia ka sur na ki khynnah skul kiba sah na Raitong lem bad kiwei ki shnong, kiba la ong ba la jan man ka sngi kim poi biang por sha skul bad don ki khep ba kim lap skul shuh, namar ba kim ioh kali bad ruh ka shimpor palat namar ka jingsniew ka surok.
Haba iakren bad bun ngut ki khynnah skul na ka shnong Raitong, ki la ong ba ha ka jingshisha na Raitong sha Umsning kam da jngai eh, namar ka don ia ka jingjngai kaba tang 10 KM tam ei ei bad kaba suk ia ki ban beh na iing sha skul bad khlem da donkam ban wad jingsahwai ha Umsning, na ka bynta ban pynduna ia ka jinglut jingsep, hynrei tang namar ka jingsniew ka surok, ka pynlong ia kiba bun ki khynnah skul ba kim poi biang por shuh sha ki skul kiba ki leit ha Umsning bad don ruh ki khynnah ba kim lap shuh syndon ban leit skul.
Ka long kaba sngewsangsot ban iohsngew ia ka sur jong ki khynnah kiba dang pule ia ka klass VII bad VIII, kiba dei ruh ki khynnah kiba la wan na ka longiing longsem kaba duk, ha kaba ki la pynpaw lem ia kata ka jingsngewkhia halor ka jingsniew ka surok bad kaba la pynjynjar eh ia ki kum ki khynnah skul.
“Nga dei u khynnah uba wan na ka longiing kaba duk bad kaba eh ia Imei ki Ipa ba kin kyrshan skul ianga da kaba ki hap ban wad jingsahwai ha Umsning” ong uwei u khynnah uba dang pule klass VII. Jin lada nga shu beh na iing ban wan skul sha Umsning kan da long ka jingiarap ia ka iing ka sem, namar nalor kaba nga leit skul, hynrei ngan iohlad ban iarap lem ia Imei Ipa mynmiet mynstep.
Haba batai ia ka jingeh kaba ki iakynduh lada ki shu beh na iing sha Umsning, kitei ki khynnah ki la ong ba bunsien ki la dep ban khreh naduh ka por 8 baje duna mynstep, hynrei haduh ban da ioh kali bad poi sha Umsning, kim lap shuh bad bunsien ki la hap ban ieng shabar lada ki poi kham kloi, hynrei bunsien la hap ban pep syndon, namar ym iahap shuh ka por ban rung sha skul.
Ki la iathuh ruh, ba ki khynnah kiba iakynduh ia katei kajuh ka jingeh, ki dei ki khynnah kiba sah na ka shnong Raitong shaduh Nongjri bad ha shilynter jong katei ka bynta ki don bun tylli ki shnong bad spah ngut ki khynnah skul, kumta kitei ki khynnah skul kiba sah ha kitei ki bynta ki iakynduh ia kajuh ka jingeh.
Haba ngi peit ia ka khubor ba mynta ka sngi u CM jong ngi u ia kren bad u Union Minister DONeR, shaphang ka ban pynbha ia ki surok sha Garo, katba ka Ri-Bhoi te la klet wat lada don 2 ngut ki MLA NPP, U wei PDF, tang are na ki San opposition party. La dei, namar kine ki MLA ba don ha liang synshar ruh kim dei ki trai Shnong. Ki panah te ki panah, ynnai sngewphylla, ia kata. Ngi dang khmih lynti ia ka 85 crore ba la don ban pyntrei noh is ka surok Mawhati, phewse wat ia kata ruh la rah ( imat Sha Garo),kumba la pynbna hi da u CM ha ka Dorbar Ri- Bhoi ba la long ha u snem ba la lah ha Guest house, Nongpoh, namar u MLA jong ngi um nud iasaid ba dang khynnah than me kumno, dang shah pynbeij kumba Ngi la shah pynbeij ha u ha ka election bala dep. Kynnaw para doh para snam, wat kmen tohoh is ia tyngka pliah hynrei peit artad is ka suk ka San la Kong. Ka pisa ba phi ioh ha ka por election kam lah ban pynkmen ia phi baroh shi rta. Tang ka too ka par bad ka ioh ka lot, ka suk ka sain ka ban pynkmen ia ngi baroh. Khublei is phi baroh ki nongpule.