Ai jingmut ka MIPF ban ai ia U Bah Lapang ban leit Rajya Sabha

Shillong: Ka seng Meghalaya Indigenous People Forom (MIPF) ka la kyntu jur ia ka sorkar MDA ba lah lamkhmat da u Conrad Sangma kum u Myntri Rangbah ka jylla ba ka dei ban shimkhia halor ka jingphah ia u nongmih khmat sha ka Rajya Sabha namar kane ka kam nong mihkhmat ka dei ba u paidbah hi uba lah jied ia ki nongmihkhmat kum ki MP Lok Sabha, ki MLA bad ki MDC.

Kumta ha kaba iadei bad kane, na ka liang jong ka seng ka kyntu ia kane ka sorkar MDA ba kan pan jingmut lem na ki trai ri trai muluk uba kumno ba kin phah mihkhmat kat sha Rajya Sabha ba dei ban long u briew uba shemphang khnang ba ka jylla Meghalaya kan ym sah ha jingdum ne jinglehrain.
“Ngi na ka liang ka seng ngi sngew dei ban ai jingmut bad kum ba ngi iohi kum jong u bah D D Lapang ki long kiba ih bha halor kane ka kam sain hima sima, kumta na ka liang ka seng watla kam don kano kano ka jingiadei bad no bad no halor ka sain pyrthei ne bad kino kino ki nongmihkhmat, hynrei ka shuh kwah ban pynpaw ia kane ka jingjied ia MP ka Rajya Sabha ba na ka liang ka sorkar jylla kan kham bha ban phah da u briew uba la lah ih ha ka kam sain hima sima, ym ban shu phah ia kino kino ki briew ki bym pat tip ia kane ka kam ia said ne thaw ain ne ki briew ki bym da tip da nang bha ne wat ia kito kiba lah don ki jingtyrwa hynrei ki bym mon satia, hynrei ba ka MDA kan jin da la bha ba kan phah ne ai lad noh ia u Dr D D Lapang ha kane ka kynti ba un mihkhmat ia ka jylla kum u dkhot jong ka Rajya Sabha,” ong ka kyrwoh khubor ba la phah da u Political secretary ka MIPF, Central body, u Bah K. Sun.