Shah kem ki shi tnga, ba bam pisa, ban pynioh kam “Ka tnga ha Along, u tnga ha Hospital”

Shillong,13 Nailar:
Ha ka 11 tarik u Nailar, ki pulit ki la ioh ka jingujor na u Ravikant Kumar uba sah ha Laitum khrah , Shillong ba ha u snem 2013 ka Meena Bharaj kaba na Happy Valley,Shillong ka la bam pisa haduh T.3.50 lak tyngka na u da kaba kular ba kan pynioh kam ha ka tnad Railway, hynrei haduh mynta um shym la ih pdiang ia ka shithi thungkam na katei ak tnad. Ha kaba ia dei bad katei ka jingujor ki pulit ki la rejistar case vide Laitumkhrah PS Case No. 129(08) 2014 u/s 420 IPC bad ki pulit ki sdang ia ka jingtohkit.
Haba kren sha ki nongthohkhubor, u SP East Khasi Hills u bah M.Kharkrang u la iathuh ba hadien ba la ioh ia ka jingujor ki pulit ki buddien ia katei ka kam bad ki la sdang da ka jingleit khynra bad talasi ha ing sah jong ka Meena Bharaj, ka tnga jong u Hardayal Singh Bharaj na Rani Building kaba don ha Happy Valley,Shillong. Ha katei ka jingleit khynra u SP u la iathu ba ki pulit ki la ioh ban kurup ia bun tylli ki Photostat kopi jong ki marksheet, admit card,Transfer Certificate,Migration Certificate,Blank Marksheet jong kiba bun bah ki paidbah, bad ki la ioh ruh ban kurup ia ka pisa kaba haduh T. 55 hajar tyngka.
Ki pulit ki la ioh jingtip ruh ba katei ka briew ryngkat ka jingiasngewthuh jingmut shitnga ki ju shet shukor ia ki paidbah da kaba pynbiang da ki kot ki sla kiba thok bad ki shithi thungkam kijba thok, bad hadien kane ki pulit ki la leit ban kem noh ia baroh arngut kitei ki shitnga, bad ka kashari ka la aibor saw sngi ia ki pulit ban tohkit ia kitei ki ar sngut , hynrei haba la leit ban leh ia ka Medical Check-up sha Civil Hospital ki bor Hospital ki bat noh ia u tnga jong ka Meena u Hardayal Singh Bharaj bad mynta utei u dang don hapoh katei ka Hospital. U Hardayal u dei ruh u Principal barim ka RB Anoochand School.
Hadien ba la tohkit kham bniah ki pulit ki la lap ba kitei ar ngut ki ju die ruh ia ki Certificate thok jong ki skul bapher bapher, ki kot ki sla kiba ki pulit ki la ioh kurup na kite ki ar ngut ki don ia ki kot jong ka skul Tiny Corner English School kaba don ha Nongmensong, ka Gorkha H E School Mawdiang diang, bad ki Certificate na kiwei pat ki skul, ki pulit ki la ioh kurup ruh ia ka kot jong ka Eastern Railway kaba ki la shna thok ban pyni sha u nongujor.