“Ka thma Bah!!”

AIS Suja

Katkum ka ktien u Blei, ngi tip ba ki don ki thma bad kan don ruh ka thma Bah (World war). Ha ka Gospel u Mathaios, la ong kumne: “Bad phin sa iohsngew shaphang ki thma, bad jingbna ki thma” Mathaios 24:6. Ki thma ba mynta kim pat long ban ianujor bad ka ban sa wan.

Ki thma hapdeng pyrthei (Middle East), ki shait jia tang ka daw ka Israel ka jingbymsuk jong ki Arab ia ki Jiw (Israel). Naduh ki por barim ki Arab ki la leh bein palat ia ki Jiw ki da ring mraw ia ki sha Babylon bad sha wei. Kumjuh ruh ka Germany lyngba u Adolf Hitler u la pyniap dusmon haduh 60 lakh ngut ki Jiw na ka daw ka jingshun thlong mluh thong sying. Kane kajuh ka jia mynta hynrei kim ioh lad shuh ban lehbein ia ki kum mynshwa namar u Blei u la dep pynkut ia ka por kaba kum kata. Ki Jiw ki la ioh kynti ia la ka Ri Israel naduh ba la pynbna ha u 1948 AD ka la dap mynta 71 snem.

Hapoh kine ki 71 snem, u Blei u la pynbiang ia ki Israel nadong shadong, ka la sei soh sei sla ka Ri ka dud ka ngap bad ki wah kiba phylla, ka Ri ka la biang ki jingstad science technology ka juk mynta, kaba khrawbor kaba lah ban ieng marwei ha la ki kjat. Kumta kiwei pat ki ri ki peit jaw dud ia ka bad kwah hiar thma ia ka da kaba thmu ban leh kum mynshwa, hynrei kim tip ba kata ka por kaba kum kata ka la kut.
Hato kine kiei kiei ki long kiba shu jia ryngkhat? Em, ka don ha ki jingthmu jong u Blei, khnang ban pyndep ia ki jingiathuhlypa ka ktien u Blei lyngba u Prophet Esekial kaba ong kumne: “To ong ha u Gog kumne u ong ong u Trai u Blei, ha kata ka sngi haba ki briew jong nga ki Israel kin shongsuk, me men ym tip ia kata? Te men wan na ka jaka shong jong me na ki bakut shatei (farther North), ki kynja bynriew (Jentil) ryngkat bad me baroh ki da shong ha ki kulai, u paidbah byllien bad ki shipai ba donbor” Esekial 38:14.
U Gog u Syiem ka Rosh (Russia) ryngkat ki paralok (Allies) jong u, un sa hiar thma ia ka Israel ha ka por ba ka Israel ka dang don ha ka jingshongsuk. Mynta ki long ki por ba ka Israel ka don ha ka jingsuk bad ka Israel ka la biang nadong shadong. Ki jingdonkam bad ki tiar thma ka juk mynta. Hynrei ka Russia bad ki paralok jong ka ki peit siar na rieh pyrshah ia ka Israel. Ka Israel ka don shibun ki shipai ba tbit ki IDF ne Israel Defence Force bad ki Israel Air Force (IAF) kiba tbit tam ki long kiba la pynkhreh bha (ready and watching). Hynrei ka por kan jia ba kyndit kyndit ka Russia (Gog) bad ki paralok jong ka kin sa hiar thma ia ka Israel. Ki ri Arab baroh ka Iran, Jordan, Egypt, Syria, Turkey, Lebanon bad kiwei kin wan ban ialeh thma ia ka Israel.
Kin ialeh thma ia ki briew jong u Blei kin wan ban tap lup ia ka Ri Israel. Kin wan bad kin tip ia u Blei ki Israel. Esekial 38:16.
Ha kata ka por bun kin tharai ba kata ka thma kan dei ka thma Armageddon hynrei kam dei kumta, hynrei ka dang long ka thma bah pyrthei kaba dang shu sdang hynrei nangne shakhmat ka thma bah kaba shyrkhei kat haduh ka sngi jong ka Armageddon. Ka thma Armageddon kan long tang shi sngi ym da ki taiew ne ki bnai bad kan jia hapoh ki por jong kita ki 1290 sngi ba la ong da u Daniel 12:11 / Jingpynpaw 16:12-16 etc.
Kumta kan long ka thma ba ka Israel ka hap ban ialeh pyrshah ia u (Gog) Russia bad ia ki Ri Arab ha ki sngi ban wan. Kan long ka thma bah kaba pynkhih win ia ka pyrthei baroh. Kumta kan don ka thma bah ha pyrthei ka ban sdang na Israel bad kan pur sha baroh ka pyrthei da ka jinghiar thma jong u Gog (Russia) lem bad ki paralok Arab jong u, u Gog un wan na shatei (North).
Te yn jia aiu ia u Gog lem bad ki paralok jong u? “Kan jia te kata ka sngi haba u Gog (Russia) un wan ialeh ia ki Israel, ka jingkhih bitar u Blei kan kiew ha ki thliew khmut jong u Blei, ong u Trai u Blei” Esekial 38:18. Ha kata ka por, kan long ka jingkhynniuh bakhraw ha ri Israel ha kata ka sngi” Esekial 38:19.
Ym don da kawei pat ka thma bah, hynrei dei kane kein hapdeng ki Israel tang na ka daw ka jingbishni pihuin atnud bad shun thlong mluh thlong sying ia ka Israel. Lait nangne kan poi ka thma Armageddon kaba tang shi sngi.
Te lada ka thma kan khie, hato ki Israel kin jah ne duh noh? Em, ha kata ka por kein ha ka jingbitar u Blei, u Blei un pyllong sdie ia ka Israel bad ki hima pyrthei kin kyndit ia kata. Namar u Blei u la kren te un pyndep. Ong u Blei – “Pha long u Sdie iapom bad ki atiar ialeh thma jong nga, da pha ngan pynlwet ia ki jaid bynriew, da pha ngan pynjot ia ki hima, da pha ngan pynlwet ia u kulai bad u nongshong jong u ……. Da pha ngan pynlwet ia ki Nongsynshar bad ki Deputies” Jeremaiah 51:20-23.
Da kane ka thma ban sa long, ka pyrthei kan tip u don u Blei, u don u Blei ha Israel baroh kito kiba ieng –pyrshah ia ka Israel kin ang lyngngoh kein ha kata ka por namar u Blei un shoh da ka jinglyngngoh bad da ka jinglamwir bad da ka jingmatlah” Sekharaiah 12:4-5.
Ka thma bah kan long hajan namar ba u Blei u la dep pynkhreh ia u Sdie bad ki tiar thma iapom jong u. ki Israel kein. U Blei un pyndep ia kaba u la kren un pyndep ia kane ka jingiathuhlypa halor ki thma bad u Blei um lamler ia kata. U ong “Nga long u Blei ngam dei u briew ba ngan lamler” Jingkhein 23:19. Kumta, shen kan sa don ka thma pyrshah ia ki Israel kaba khraw ka ban ialam lynti da ka Russia bad ki paralok jong ka. Kata katkum ka ktieb u Blei.
Wat sngewthuh bakla ba lada kan khie ka thma bah, kata kam pat dei ka thma Armageddon. Ka Armageddon kan jia tang shi sngi hynrei kaba shyrkhei tam bad kaba khadduh ha shuwa ba u Jisu Khrist un synshar 1000 snem hangne ha pyrthei. Jingpynpaw 20:4-6 / 1 Korinth 15:25.