Nang huri hura ki dorbar shnong

Bah RM Shabong

Ha ki khyndiat sngi ba ladep, la iohi ia ki jing kynrum kynram halor ki rukom trei kam jong ka dorbar shnong ha Nohwet bad ka dorbar Raid ha Raid Shabong bad ha shwa kata ngi iohi ba khyndiat bnai mynshwa, ka la mih ka jing iakhih pyrshah ia ka jingthung Rangbah Shnong ha Baridua bad kam dei tang katta, kane ka kam ka ju jia khah khah, ha kiba bun ki shnong, ki raid, ki Hima, khamtam ha ki nong kyndong bad katei ka kdew shai ba ka don ka jingdkoh ka rukom pyniaid ryntih ia ki ain halor ka bor jong ki Sirdar, ki Rangbah Shnong lem bad ka bor jong ka dorbar lane ki paidbah ruh kumjuh.

Ki jingjia ha kine ki sngi, ki kdew shai ba ka rukom trei jong ki dorbar shnong, ki dorbar Raid lane ki dorbar Hima, ka long kaba shu antad, kaba shu shu mutdur lane kaba shu kam ia kaba rim bad ka bym lah ban pyn shisha ne pyn thikna satia bad ka dei na katei ka daw, ba ki nong synshar ruh kim sngewthuh ia la ka jong ka bynta bad u paidbah lei te shano, ula ia bunkam sa tang ka ia tied miej.

Kine ki jingdkoh jong ki rukom pyniaid ha ki shnong, ha ki raid, ha ki hima bad ki jing bym tip, ki ailad ia kiwei pat ki bor, kum ka bor jong ka kashari, ka bor jong ki pulit, ka bor jong ki ophisar bapher, ba kin shim kabu bad lushia katba ki sngewbit, lane kaba long hi, ba ki pynduh pyndam pynban ia ka riti dustur, kaba ngi ju iakren ba ngi kwah ban pynneh pynsah, kumba la hikai u myn barim.

Ka rai jong ka kashari, ban ailad ia ki kynthei ba kin shong dorbar, ka long kaba bakla ha kiba bun ki dorbar shnong, wat la ki don pat kiba la pdiang kumta ruh, hynrei ka kashari kam tih ne iit bniah ia kine ki jing shisha, hynrei ka pynmih ia la ka jong ka rai bad ym don hi mano mano ba lah ban ia said ksan lada dei ka Hima Khyrim, ka District Council bad kumta ka rai ka long kaba kut bad ka bym lah satia ban khylliap da kiwei ki bor.

Ka dorbar Jylla, ka dei kaba dang thymmai ha Ri Khasi Jaintia bad wat ka District Council ruh, hynrei kaba sngewsih ka long ba ki bor jongki, ki heh shi katdei ia ki dorbar shnong bad nangta, kitei ki don la ki jong ki kyndon ain, katba ki dorbar shnong, kiba la neh naduh ka por jong U Tirot Sing, kim don satia ia ki kyndon kiba shai bad kane ka la shu pyn kylla baji, ia ka iktiar ki nong synshar Shnong.