Byrngem ban sangeh kit dewbilat lada ym pynkiew dor bai kali

Jowai: Ka All Jaintia Cement and Clinker Transporters’ Association (AJCCTA) ka la ai por tang shi taiew ia baroh ki karkhana pynmih dewbilat lyngba ka seng jong ki, kaba la tip kum ka All Jaintia Cement Manufacturer’s Association ba ki dei ban pyntreikam noh mardor ia ka rai ka sorkar ban pynkiew ia ka baikit baibah kaba 0.70 naia (Paisa) shi Quintal man la ka shi kilometer.

U President ka AJCCTA, u ma Balen Thubru u la pyntip ba ha ka jingialang jong ka JAC kaba kynthup ia ka AJCCTA bad ka Meghalaya People Labour Union (MPLU) kaba la long dang shen ha Hynniawmer, West Jaintia HIlls ka la shim ia kane ka rai ban dawa na kitei ki kharkhana pynmih dewbilat ban pyntreikam noh mardor ia ka rai jong ka sorkar ban pynkiew ia ka baikit baibah jong ki truck kiba shallan ia u dewbilat na Lumshnong sha kiwei kiwei ki jaka jong ka jylla bad bar jylla kumjuh.
“Lada kitei ki kharkhana ki kyntait ia kane ka jingdawa jong ngi, hadien hynniew sngi, ngin sangeh noh ban kit ne shallan ia u Dewbilat jong ki”, la ong u ma Balen Thubru.