Ha ka taiew ban wan, lah ban hap shuki u Mukul

Shillong, 12 Nailar:
Ka tyllong khubor ka iathuh ba u Myntri Rangbah ka jylla u lah ban sloit shuki noh ia ki katto katne ki myntri kiba phoi lian ban iakhih pyn khyl lem ia u na ka shuki Myntri Rangbah.
Watla ym pat lah ban tip thikna iano un pynhap shuki, hynrei la suba jur ba ki myntri kiba kham paw khmat ban iakhih ban pynkhih ia ka shuki myntri rangbah, kin hap shah mait ha ka kti jong u Mukul Sangma.
“Kane ka jingpyn hap shuki, ka lah ban jia ha kane ka taiew ban wan”, la ong ka tyllong khubor.
Ka jingpep jong u general secretary ka AICC ba peit ia ka Meg halaya u Luizinho Faliero ban wan mynta ka sngi bad lashai kumba la pyn bna kham mynshwa, ka la paw shai ba ka la don eiei ha lyndet halor kane.
Katkum ka jingpynbna kham mynshwa, u president ka MPCC u Bah DD Lapang u la pyntip sha ki MLA ka party ba u Faleiro un wan ban iakynduh ia ki MLA bad ki nongkitkam ka party ban iakren ia ki jingeh bad ki kynrum kynram.
Ka kynhun jong u Bah Lapang dang shen ka la iakynduh ia ka Sonia Gandhi bad u Rahul kynthup bad ki myntri Bah Prestone Tynsong, Bah HDR Lyngdoh nalor u MM Dango ban dawa tuklar ban pynhiar shuki noh ia u Myntri Rangbah u Mukul Sangma.
Ha kawei ka liang, ka tyllong khubor, ka iathuh ba ki MLA ba don bad u Mukul, ki la pynlong ia ka jingiakynduh lang ha kane ka janmiet sngi Hatmajai ha iingsah jong u Myntri Rangbah ha Shillong. Tangba ym tip thikna la ka jingiakren ka long halor ka mat.