Kam don kano kano ka jingbthah iano iano ruh napdeng ki dkhot ban leh ia kine kine ki kam, pynshai ka COMSO

Na ka Liang Jong ka Hynniewtrep Youth Council bad kumjuh ruh ka Confederation Of Meghalaya Social Organisation, lyngba ka kyrwoh na u Roykupar Synrem u General Secretary ka HYC ki la pynmih ia ka jingpynshai ba ka kynhun haduh mynta kam pat shym la ia don bynta ha kino kino ki kam pynkulmar ne ki jingthang Kali bad ki jingiakhih kiba ktah ia ka shongsuk shongsain ha ka Jylla hi baroh kawei. Kum ka kynhun ngi dang iaid da ki lynti kiba ba jai jai bad haduh mynta ka direct action jong ka COMSO ka dei ha ka lynti ba jai jai. Ka kynhun kan dang bteng shwa ban iakhih da kaba jai jai ia mynta hi.

Ka jingkem jong ki pulit ia ki dkhot ka seng halor ka jingsuba ba ki don kti ban thang ia kita ki Kali ha kine ki sngi ba lahdep, ka dei ka kamram jong ki bad na na ka liang ka seng kam pdiang pat ba ki dkhot jong ka Seng kiba la kem da ki pulit ki lah leh ia kine ki kam, namar ka Seng kam Shym la phah iano iano ruh na ki dkhot ka seng ban leh ia kum kita ki kam.

Kaba ngi sngew lyngngoh eh ka long ba na ka liang ki pulit ki pyrshang ban pynkhleh ia ki kam ing bad ki jingiadei shipara ar kmie u President ka seng uba dei ruh u chairman ka CoMSO bad uwei na kiba shah kem halor katei ka jingsuba. Kan don bynta aiu kata ka jingiadei shipara ar kmie bad kata ka kam? Kum ban ai nuksa, lah ban don kiba ha ing ki pulit, ki minister, ki MLA bad kiwei kiba don kti ha ki kam be-ain, hato kane mut ba kita ki pulit, ki minister bad kiwei kin shah kynthoh lang ne ki donkti lang ha kum kita ki kam? Ha kano kano kynhun bad wat ha ka tnad pulit don beit kiba ialeh pyrshah ia ki nongialam, nuksa u SP u lah ban ong ba ki OC kim dei ban pynlait truck dewiong hynrei ioh ki pyllait, kam mut pat ba ka tnad pulit baroh kawei kan don kti ha kata ka kam pynlait dewiong tang ba don uwei ne ar ki briew ka police kiba leh kumta .

Te ngi kyntu ia ka tnad pulit ba kim dei ban pynkhleh ia ka kam ka kynhun bad ka kam iadei shi bahaing bad kata ka jing kem briew ka jong ki. Ngi kren shai ba na ka liang ka seng hi kam don kano kano ka jingbthah iano iano ruh napdeng ki dkhot ban leh ia kine kine ki kam ba kwah ia ka shongsuk shongsain ha ka Jylla hi baroh kawei.