Phet ki khar shana na Iewduh

Shillong,12 Nailar:
Wat la ka KHADC lyngba ka tnad khaii pateng ka la ia khun na ka por sha ka por khlem sangeh ban kyndang lut ia ki khar die madan kiba la pynkhapngiah ia ka Iew duh, phewse watla ha pdeng hapdeng ka jing khynra kaba bun bun sien ki khar die madan kim patiaw eiei, bad tang shu lait ki pulit KHADC ki la seng biang ia ki tiar ki tar jong ki.
La iohi ba ha Iew duh, watla ki pulit KHA DC ki la knieh bad kurup ia bun ki mar die madan hynrei ki khar die madan ki mih shi mih shylluit, bad la iohi ba ki la dap biang ha ki lynti iaid kjat khamtam eh ki khar die shana ki bym salia eiei.
Mynta ka sngi la iohi ba ha ka por mynstep , h aka por ba u nongthohkhubor u iaid lynti ha Iew mawlong la iohi ba ki ka kynhun ki khar die shana ki dang ia die shana sahuh khlem jingkhuslai eiei ha ka juh ka lynti iaid kjat kaba ka KHADC ka la dep ban khynra naphang. Hynrei tang mar ia ioh jingtip ba ka don ka jingialang paidbah ha Iewduh, ki la ia pynsted ban lum tiat lum tar noh bad la iohi ba shiphang ka lynti Iewmawlong ka la kylluid war.
Lah ban kdew ba katei ka jingphet krad ki khar die shana ka dei hadien ba u CEM ka KHADC, ki EM ryngkat ki pulit Enforcement kiba la wan ban synran ia ki, ki la jan poi ha ka jaka pynlong jingialang, bad katei ka pyni shai ba kitei ki khar die madan ki don la ki jong ki nongsyntiat ba tang shu iohi ba ki pulit KHADC ki iaid lynti ki nongpyntip ki la don lypa, bad ki la phet bak na ka jaka ba ki shong die madan.