Buh nong syntiat ha Iewduh; ujor lada i pher:Ardent

Shillong,12 Nailar:
Ban wanrah biang sa shisien ia ka dur ba itynnad ka Iewduh, ka Khasi Hills Autonomous District Council ryngkat ka Hima Mylliem ha ka sngi hat majai ki la pynbna paidbah ia ka rai ba ki la shim ha ka jingialang jong ki kaba la long ha ka 28 tarik u naitung , ban buh da ki kyndon bad ki sienjam kiba yn sa pyntreikam noh shen.
Shi bynta na kitei ki sienjam ba ki la shim ka long ban phah da ka jingthoh sha ka ophis ka Municipal kaba yn phah da ka KHADC bad ka ophis ka Hima Mylliem , ba ka Municicpal ka dei ban weng noh ia ki nar um kiba la pyniaid rynjiw rynjaw ha shi lynter ka Iewduh kaba la pynmyn saw ia ki nongiew kiba leit ba wan, bad la iohi ruh ba ka jingdon kitei ki Pipe um kiba la shu pyllait pathar ka dei kawei na ki jingtuid ki um jaboh kiba pynlong ktieh ia ka Iewduh.
Kawei pat ka rai kaba ia dei na bynta ka jingpynkhuid ia ki jaboh ka dei ka jaka leit bar kaba biang, kaba ka KHADC ka la kyntu ia ka Hima Mylliem ba ka dei ban wad jaka ban shna ia ki jaka leit bar kiba thymmai, namar ba ka jingleit shabar pathar ki paidbah ha lynti syngkien ka pyni saitmet ban iaid ban ieng hapoh Iew. “Mynshuwa ki rang khasi ki ju leh rain wat ban ieng ha ki jaka kyndong ban leit shabar, hynrei mynta pat la nud ban phai la ka phai shadien khlem jinglehrain mat dep shato” ong u bah Ardent Miller Basaiawmoit CEM KHADC, uba la kren ba lyngba ka jingdon ki jaka leit bar kiba biang kan wanrah ia ka burom ka akor hapdeng ki nongiaid lynti , ki kynthei ki khynnah.
Ka KHADC ka la shim ruh ia ka rai ban buh da ka jaka ba kyrpang ban pdiang ia ka jingujor bad ka jingai jingmut ki paidbah kiba long ki nongsyntiat ha Iewduh, ka la buh ia ka kamra ba kyrpang kaba la pynkhreh hangtei da u Special Officer u ban shim ia ki jingujor na ki paidbah nongsyntiat ia ka rukom long ka Iewduh, la pynbna ba ki paidbah lada ki don ka jingipher ha Iewduh ki dei ban ujor sha u bah B.Diengdoh ha ka kamra No.217 lane da kaba phone sha u nombar phone jong u 9863177599. U bah Ardent u la kyntu ia ki paidbah ba ki dei ban sdang ka jingleh khuid nalade, da kaba rah ia ka la jong ka pla ba kyrpang ban lum ia ki jaboh bad ki niut ki nier bad haba la khang iew ki dei ban bret sha ki jaka bret niut ba ka Hima Mylliem ka la pynkhreh.