Kwah pynjynsur pakhang shnong ki nongiew

Shillong, 11 Nailar: Ka seng ki nongiew Ka Iewduh Khasi Pnar Association (KIKPA) ka la kyrpad ia ka seng HNLC ba kan pynjynsur noh ia ka kynta pakhang shnong na ka 48 kynta sha ka 24 kynta.

Ha ka kyrwoh ba la pynlait, u Secretary ka seng u Bah KR Lyngdoh u la ong ba kwah ban pynsngew ia ki jingeh ba kynduh khamtam ban ioh ia ka pakhang shnong kaba khah khah tang hapoh ka shi taiew. “Tang ha kane ka shi taiew, ka iew ka la hap ban khang haduh lai sien”, la ong u Bah Lyngdoh bad bynrap, ha ka 6 tarik la pakhang shnong ki nongkhaii dewiong, ha ka 12 tarik kan don ka jingkhang iew namar ba don ka jingialang ba khot jong ka KHADC bad u Syiem Mylliem bad ka pakhang shnong ka HNLC naduh 14 bad 15 tarik. Halor kane ka jingkhang, ka seng ka la kyntu ia ka seng ba kan pynjynsur ia ka pakhang shnong namar ba ki nongrep kin iakynduh jingeh shibun khamtam kiba wan die ia ki jhur ki jhep kiba lah ban pyut kloi. Ka seng ka kyntu ka ka HNLC ba kan pynlait noh ia ka pakhang shnong ha ka 14 tarik khnang ba ki nongrep kin lah ban wanrah ia ki mar rep jongki, la ong ka kyrwoh na u secretary ka KIKPA.