Mih paidbah ha ka sngi pakhang shnong, ong ka sorkar

Shillong, 11 Nailar:
Ka sorkar jylla ka la kyntu ia ki paidbah ka jylla ba kin ia mih paidbah khlem jingtieng ha ka sngi pakhang shnong ba 48 kynta da ka seng lehnoh HNLC naduh ka 6 baje janmiet ka 13 tarik haduh ka 6 baje janmiet ka 15 tarik ha Khasi bad Jaintia Hills.
Ka HNLC ka la khot ia ka pakhang shnong ban pyrshah ia ka jing khang tih dewiong ka NGT bad kawei ban pyr shah ia ka jingrakhe sngi laitluid ka ri India ha kane ka jylla.
Ha ka jingpynlait kywroh ha kane ka sngi Nyngkong, ka sorkar ka la ong ba ka seng HNLC ka dei ka seng beain ba la pynngat ha ka Unlawful Activities (Prevention) Act, 1967 naduh ka 16 tarik Naiwieng 2000 bad ka la pyrshah ia ka jingrakhe sngi laitluid ha ka rid a kaba khot pakhang shnong hynrei na ka liang ka sorkar ka la shim ia ki lad ki lynti ban pynthikna ba kane ka pakhang shnong kan nym treikam satia” la ong ka kyrwoh ba la pynlait ka sorkar ha kane ka sngi Nyngkong. Ka sorkar ka la ong ba ka la kut jingmut ban pynneh ia ka suk ka sain bad ka jingshngain jong ki paidbah ka jylla.
“Ki paidbah bad ki nongtrei sorkar kim dei ban shah shkor ia ka jingkhot pakhang shnong ka bym shong nongrim eiei bad ki dei ban ia mih paidbah kitei ki sngi kumba ju long khlem kano kano ka jingtieng”, la ong shuh ka sorkar lyngba ka kyrwoh. Ka sorkar ka la kyntu ruh ia ki paidbah ban wan sakhi ia ka jingrakhe sngi laitluid ka India ba 68.