Ka Assam Higher Secondary Education Council (AHSEC) jong ka jylla Assam ha ka 8 tarik rymphang 2020 ka la shim ia ka rai ban weng noh ia ka subjek ‘Alternative English’ bad ban bujli noh da ki Bangla, Bodo, Nepali, Hmar, Manipuri, Garo, Khasi, Mizo, Urdu bad Hindi na ka bynta ki khynnah klas 11 bad 12.
Ia kane ka rai la shim hadien ka jing ialang ba la wan shim bynta da ki ophisar na ki tnad bapher bapher jong ka jylla Assam kiba kynthup ia ki stad ha ka pule puthi.
Kumba shu pynkynmaw ha u snem 2019 ka kabinet jong ka jylla Assam ka la shim ruh ia ka rai ban pynlong salansar ia ka ktien Assamese kum ka subjek haduh ki klas 10 lait noh ki skul ba hap hapoh ka BTAD, ha Barak Valley bad ki jaka ba bun ki jainbynriew Bodo.
Na ka liang u myntri ka tnad pule ka jylla Assam u Himanta Biswa Sarma dang shen u la ong ba un rah ia ka ‘Bill’ hapoh ka ing dorbar thaw ain ka jylla ba ki briew ba khlem shim ia ka subjek ‘Assamese’ ha ki klas 10 kin nym ioh kam sorkar hapoh ka jylla Assam.
Ka long kaba sngewtynnat ban ioh ia kane ka jing i thuh ia ka ktien khasi da ka sorkar Assam. To kan kyntiew ia ka roi ka par bad imlang sahlang ha ka bynta ba shaneng lam mihngi jong kane ka ri India jong ngi. Ngi kyrmen ruh ba ngin ia suk noh u pud u sam bad kane ka jylla marjan ba shaneng ka Ri Khasi jong ngi, ha kajuh ka por. Khublei Bah Editor.