Hiar thma ki shipai America, ia ki ehrang ISIS ha Iraq

Ki shipai jong ka America, ki la hiar thma mynta ka sngi, ia ki ehrang ISIS, kiba don ha ki bynta ba shatei jong ka America. Haduh ba thoh ia ka khubor, ym pat ioh khubor, ia ka jingduh jingjulor, na kano kano ka liang, namar ba ka jing ther bom jong ki shipai ka America, ka dang sdang ha ki bynta ba shatei ka Ri.
Kham mynshwa, U Barack Obama, ula ai bor ia ki shipai jong ka America, ba kin hiar thma ia ki bynta ba shatei jong ka Iraq, na ka bynta ban pyllait im, ia ki mynsiem ba kordor jong ki phew phew hajar ngut ki jait bynriew bym dei Muslim, kiba la shah ker kut mynta ha ki ehrang ISIS, ha kaba ki don jingthmu ban pyniap naphang.
Ka jingmih jong U Barack Obama, ban iarap ia kitei ki riew paidbah, ka dei hadien, ba ki ehrang ISIS, ki la leit hiar thma sha ki bynta ba shatei jong ka Iraq, ki la pyniap naphang ia ki riew paidbah bad ki la beh krad ia ki, na ki iing jongki, ba kin leit shong sha ki ri shyiap.
Ki ehrang ISIS, ki iathuh ba kitei ki jaitbynriew Yazidis, ki dei ki riew mane ksuid bad la iathuh ba kitei ki don kumba 50hajar ngut, ha kaba mar shiteng na ki, ki dei ki khynnah bad ki rieh ialade ha ki krem, kiba don ha kitei ki jaka bad kitei kin shah pyniap ha ki ehrang ISIS bad nangta kin shah pyniap ruh na ka jingshit kaba jubor bad nangta sa ka jingthngan, namar ba kitei ki jaka ri shyiap, ki dei kiba don ha ka jingshit kaba poi haduh 42C.
La iohi, ha ki dur, ba ki jaitbynriew Yazidi, ki rah ia ki met iap jong ki phew phew ngut ki hep rit, ha kaba la pyniap dusmon da ki ehrang ISIS. La iathuh ruh ba ki ehrang ISIS, ki pyni paidbah ruh ia kito ki kynthei, kiba la shah pyniap ki tnga jongki, na ka bynta ban ai ha ki ehrang ISIS, kiba dang samla.
Hynnin ka miet, U Obama, u iathuh ba ki shipai America, ki la leit pynhap jingbam sha ki jaka ba ki sah ki jaitbynriew Yazidis, ha ki lum kiba kynjang bha.
Na ka liang jong U Pope Francis, u la kyrpad ia ki ri jong ka pyrthei, ba kin iarap lem ban pynkut noh ia katei ka jing ia kynad bad katei ka dei hadien, ba kawei ka nongbah, kaba don bun bah ki kristan, ka la shah pynjot bad ba bun ki kristan, ki la phet noh, na la ki iing ki sem, na ka bynta jong ka jingma, ia la ka jong ka jingim.