Maham dril Um, ka KSU Mawlai

Shillong,8 Nailar:
Ka Khasi Students’ Union Mawlai Circle ka pynkynmaw biang ia baroh ki nongshong shnong jong ka Mawlai baroh kawei ba na ka liang ka seng lyngba ka Environment Committee ka maham jur ha kaba iadei bad ka jing drill um namar kane ka ktah jur ia ka bor mariang bad kumjuh ruh ka ktah ia kiba bun ki tyllong um kiba pyndonkam man la ka sngi. Ka kyrwoh na u Environment Secretary ka seng u bah Fillbert R Shullai u la pynpaw ba ka seng ka kyrmen ba ki paidbah kin ai ka jingiatreilang na ka bynta ka jingbha jingmiat bad ka jingioh nong jong ka pateng ban wan. Kumjuh ruh ha kaba iadei bad kiba leh ia flushing kin sngewbha ban da pyntip sha ka seng khnang ban lait na kano kano ka jingbym ia sngewthuh jingmut, ong ka kyrwoh. Ha kajuh ka por na ka liang ka seng ka pynkynmaw biang ia ki trok kit nuit jong ka Municipal haba ki wan theh nuit sha Marten ki dei ban da tap ia ki kali jong ki khnang ban lait na ka jinghap pathar jong ki nuit ha ki surok shnong.