Shillong: Ka UDP kam treh ban shu shim rai kyrkieh palat ha kaba iadei bad ka jingleit kyrshan u MDC uba dei ruh u Working President bah Paul Lyngdoh bad u bah Teiborlang Pathaw, sha ka kynhun United Democratic Forum (UDF) ba ialam u CEM bah Latiplang Kharkongor ha KHADC.
Haba iakren bad u General secretary ka UDP u Dr Jemino Mawthoh u la iathuh ba ha ka jingshisha kila ioh pdiang ia ka jubab ba la phah da u bah Paul bad bah Teiborlang hynrei kim pat ioh ban iashong jingialang ban iakren sani bha ia kane ka kam.
“Ngim treh ban shim rai kyrkieh, ngin iashong jingialang ha kine ki sngi ban iakren janai namar ba ki don ruh ki dkhot kiba dang bunkam palat”, la ong u Dr Jemino.
U la ong ba ka jingbym don ka ain kaba khang ban kyntiap seng ha District Council, ka la pynlong ia ki MDC ym tang jong ka UDP, ban leh lait mon ban ialeh pyrshah ia ka party.
“Ngin eksamin ia ka jubab jong ki, ngin shim sa ia ka rai, ngin sa shong jingialang kyrpang shen ia kane”, la bynrap u General secretary ka UDP.
U la ong ka jingbym don ka ain khang kyntiap seng, ka la ai laitlan ia ki MDC ha ki district council, ka la pynlong ia ki MDC ban iaid lait teng teng na ka party. “Ha district council ka kolshor ka long beit kumto hynrei kum ka party kaba don nongrim, ka UDP kan bishar bniah bha”, u la ong.
U la iathuh ba namar bym don ka ain ban tehlakam ia ki MDC, ka la mih ka kynrum kynram ka jingiamih iapher bad ki don kiba ai daw bym biang nongialam, bym biang ki rukom pyniaid kam bad kiwei ki daw.
Lah ban kdew ba ka UDP ka la pan jubab hapoh 24 kynta na ki ar ngut ki MDC kata u bah Paul Lyngdoh bad bah Teiborlang Pathaw hadien ba kila rai ban kyrshan ia ka kynhun UDF hynrei haduh mynta kine ki dang dei ki MDC ka UDP kaba don ha ka kynhun United Democratic Alliance (UDA) ba ialam ka UDP ha kaba u bah Teinwel Dkhar u dei u nongialam.
Halor ka jongphet jong ki ar ngut ki MDC ka UDP, ka don kaei re kaei sha lyndet. Bad nga ngeit kadei ka rai ba biang tam ban ia kaba ki don hapoh ka UDP kaba dei ka seng kabym don nongrim (undemocratic party).