Syier mynsiem ka shnong 20 Mer, ba iai twa khyndew

Nongpoh, 08 Nailar:
Ka jingtwa jong ki bynta lum harud ka surok bah 4 Lane, ki la nang iai jia man ka sngi kaba la wanrah jingma ia ki paidbah kiba shong ba sah syndah bad katei ka surok bah, kum ha Ri-Bhoi district.
Kawei na ki ïing ha 20 Mer, Ri-Bhoi district, ba la long trai da u Bah Liana Rani bad ka Kong Meltina Lyngdoh ka don ha tmier jong ka jingma, namar ka khyndew ranab lum kaba tei ka ïing ka don ka lah ban twa khamtam ha kane ka aiom lyiur kaba u slap ba jur bha u lah ban wan ha kano ma kano ka por. U trai katei ka jaka u Bah Liana Rani, haba kren bad u nongthoh khubor, u la ong ba ngim pat lah ban mih na katei ka jaka namar ka sorkar na ki bor ka Ri-Bhoi district bad ka NHAI kim pat ai satia ia kano kano ka jingsiew bai jaka ne ka bai lutksan (compensation) haduh kine ki sngi watla ki la wan thew wan woh ia katei ka jaka da kaba pynngat ia ka sha ka surok bah. U Bah Liana u la ong ruh ba kum ka ïing kaba kyrduh bad duna ha ka ioh ka kot, um lah kot bor ban thied bujli da kawei ka jaka ban shna ïing, dei halor katei ka daw ba kim nud ban mih na katei ka jaka watla ka la long ka jaka ba wanrah jingsyier mynsiem ia ki kum ka ïing ba ioh ha kano ma kano ka sngi katei ka khyndew ka lah ban twa.
U Rangbah Shnong ka 20 Mer, u Bah K Syngkli, haba la ioh iakren halor katei ka jingma jong katei ka jaka ba twa, u la ong ba lada ka NHAI bad ki bor district kim lah ban siew noh ia ka bai lutksan, kin hap ban bahkhlieh lada jia ei ei kaba sniew ia ka jingim jong ki nongshong shnong, namar kim dei kiba ioh ba kot bad kiba riewspah bad kumta kim kot bor satia ban thied jaka shawei pat khamtam ha kane ka pyrthei rem jaka mynta. U la ong ruh ba katei ka jingtwa katei ka khyndew sa tang katto katne ka la poi ha tmier jong ka ïing bad ka long ka jingma ia ki briew kiba shong ba sah hapoh jong ka bad kumta kum u nongialam shnong u kyrpad jur ia ki bor district bad ia ka NHAI ba ki dei ban siew noh ia ka bai lutksan jong kitei ki trai jaka bad ba ka shnong kam lah ban bahkhlieh lada jia kaei kaei kaba sniew, hynrei ki bor sorkar bad ka NHAI ki dei ban shim ia ka jingkitkhlieh lada jia ei ei.