“Harud jong ki wah Babilon”

AIS Suja

“Harud jong ki wah ka Babilon” ki long ki kyntien kiba baroh ka pyrthei ka tip bad iohsngew namar la rwai ia ka da ki Nongrwai Boney-M kiba pawnam jong ka pyrthei, ka long shisha ka jingrwai kaba bang tam bad ki jingtem (musical) kiba bang. Hynrei to ngin tip ba kine ki kyntien jong kane ka jingrwai la shim na ka Kitab Salm u David 137:1-6.

Kane ka jingrwai ne ki kyntien na ka ktien u Blei, Salm 137 ki thew shaphang ka por ka jingshah ring mraw jong ki Jiw (Israel) sha Babylon bad sha kylleng. Ka jingshah ring mraw ki Jiw kam dei kaba shu jia ryngkat hynrei la kren lypa da u Blei na bneng u dang ong – “Lada phi phai lyndet bad iehnoh ia ki ain jong nga, bad ia ki hukum jong nga ia kiba nga la buh ha khmat jong phi bad phin leit shakri ia kiwei pat ki blei bad mane ia ki : Te ngan rat noh ia ki naduh tynrai na ka ri jong nga (Ri Israel) ia kaba nga la ai ha ki” 2 Chronikl 7:19-20. Nangta u Blei u ong shuh shuh ba un wallam ia ki jingkyrkhu lada kohnguh bad ka jingtim namar ka jingbymkohnguh. Deuteronomi 28:1-25. Kaei kaba la jia ia ki Jiw? Ki la jied ia ka jingtim (Cursing), kumta u Blei u la pynsakma ia ki sha kylleng bad sha Babylon. Ha Babylon harud ka wah ka Babylon ki Jiw ki la ia shong thap ngab bad ki ia iam namar ba ki kynmaw ia ka Seion (Jerusalem). Kim nang shuh ban tem ban rwai wat lada ki long kiba nang ban tem hynrei ki shu sdien ia ki duitara jong ki halor dieng jamynrei. Ki nongbah Babylon haba ki iohi ia kane ka jingsngewsih jong ki Jiw ki la ong ha ki “To rwai ha ngi ia ki jingrwai Seion jong phi” hynrei ki Jiw ki ong – “Kumno ngin rwai ia ka jingrwai u Trai ha ri nongwei (Foreign land)? Salm 137:4.
Hynrei dei ka jingieit pat jong u Blei ia ka jaid bynriew ba u la pyllait ia ki bad ba u la lum lang pat ia ki sha ka Ri lajong ka Ri Israel hadien bun spah snem bad hajar ki snem. Kum ka jaid bynriew kaba mad shisha ia ki jingeh bad jingkthang ba shyrkhei tam haba ki la shah lehbein kum ki mraw haduh ka jingiap kein.
Ka jingiap kaba shyrkhei tam dei ka jingshah pyniap ha ki kti u Adolf Hitler haduh 60,00000 ngut ki Jiw ia kaba ka Israel ka rakhe mynta kaba ki ong Holocust, ka khlam jingiap kaba shyrkhei. Ki Jiw kim lah ban klet ia kane ka Holocust bad ki ong ba kan ym jia shuh sa shisien bad kata ka long kaba shisha namar u Blei u la dep pynkut ia ka ia (age) ka jingsynshar Jentil ha Israel bad ha Jerusalem. Ki Jiw ki la long mynta ka jaidbynriew bakhraw ba don bor tam ha ki liang baroh namar u Blei dalade u la pynkut ia kata ka ia.
Ka long shisha ka history kaba sngewsynei na ka bynta ki Jiw ym tang ba ki la ju long ki mraw ha Ri nongwei hynrei ki la shah pyniap ruh bad shah lehbein, bad kane ka mih na ka daw ka jingkyntait jong ki ia u Blei uba im u Blei u Abraham u Isaak bad u Blei u Jakob.
Kine kiei kiei ki long ki jingiathuhlypa ka ktien u Blei ia kiba la lah pyndep bad ki sah satang ha jingkynmaw, namar u Blei u la ieit palat ia ki Jiw um lah ban kylla ktien hynrei u la dep ai pat ha ki ia ka Ri kynti jong ki ka Israel kein naduh u 1948 A.D. kaei pat kaba ki Jiw kin leh mynta ka long ban pynkhreh ialade ban iada ia lade ban ialeh ia ki thma kiba rit bad khraw namar u Blei u la ai pat ha ki ia ka Bor bad ka por bad mynta ka long ka pali jong ki Jiw pat ba ka pyrthei kan iohi bad kan tip kiei ki Jiw? U Blei u la sdang pat mynta ban pyndep ia ka ktien kaba u la ong ha u Jeremaiah – “Pha long u sdie iapom bad ki atiar ialeh thma jong nga, da pha ngan pynlwet ia ki jaidbynriew bad ia ki hima ka pyrthei” Jeremaiah 51:20. Shisha ka la long kumta bad kata ka la sdang mynta, bad haba ngin iohi ia kine kiei kiei kiba la thoh la pyndep to tip ba kata ka por ba jynjar tam (great tribulation) ka hajan bad ka jingwan u Trai Jisu sha ka pyrthei ruh ka la jan.
Ki Jiw bad ka hima Israel mynta ki la leh ban ieng marwei bad ia kane la pynbna da u Prime Minister ka Ri Israel u Benjamin Netanyahu.Satang kawei ngin tip ba kata ka por kaba jynjar tam ka don hajan bad kiba kita kiei kiei ka long hajan kein. Jingpynpaw 1:3. Ki Jiw kiba mynta ki long kita ia kiba u Blei u la pynsah na ita i jingsah ba rit khnang ban ioh pyndep ia ki jingkular namar u Blei um dei u briew ba un lamler. Jingkhein 23:19.
Kumta na ka jingshah ialam mraw sha Babylon haduh ka jingshah pyniap kaba shyrkhei ia ki Jiw, ki Jiw ki la long mynta ki atiiar ialeh thma jong u Blei, bad kine kein ki long kita ki sngi kiba khadduh. Kumta donkam ia uwei pa uwei ban ioh ka jingkylla bamut (repent) bad pdiang ia u Jisu Khrist uba long u Nongpynim ka pyrthei u bym niew shiliang khmat iano iano. To kylla kaba mut namar ka hima ki bneng kan seng hangne ha pyrthei ka la jan. “Nga long ka ktien jong uba pyrta ha ka ri khlaw, to phin pynbeit ia ka lynti u Trai” Amen Ioanis 1:23.