Pur ka jingpang Ebola satlak pyrthei

Ka jingpang Ebo la, kaba la khie jubor bha, ha kine ki sngi, ka buh ia ka jingma kaba khraw ia ka pyrthei hi baroh kawei, namar ba wat ki doktor, kiba sumar, ki la bun kiba iap, na ka jingtrei jubor jong katei ka jingpang.
Ki don saw tylli ki Ri ha Africa, kiba la ngat ia katei ka jingpang kaba shyrkhei bad ki don mynta, kiba la ngat ia katei ka jingpang, haduh 1,700ngut bad ki don sa 932ngut kiba la iap haduh ha ka Lah Sngi U Blei ba ladep, ba kynthup ia 80ngut ki doktor bad ki nongsumar. Ka World Health Organisation (WHO), mynta ka sngi, ka maham tyngeh, ba katei ka jingjia, kan lah ban nang jur, kham palat, ia kaba ka la jia ha u snem 1976.
Ka Director General jong ka WHO, ka Margaret Chan, haba kren ha Geneva, Switzerland, ka iathuh ba ka jingpang, ka khie jubor bha, palat ban ia kaba la khmih lynti ban pyndem ia ka. Ka la ong ba kito ki Ri, kiba la mad ia katei ka jingpang, kim don lad ban ialeh pyrshah bad ban pynduh pyndam ia ka jingpang.
Haduh ka Lah Sngi U Blei, ki don 1,711ngut kiba la ioh ia katei ka jingpang bad na kitei ki don 1,070ngut kiba la thikna bad 436, kiba don jingtohkit bad sa 205ngut kiba don ha ka jingsuba bad sa 932ngut kiba la iap na katei ka jingpang.