U samla Kerbor U ‘Nai Khadsawsyñnia, ka samla Gardenia kum ka Lukhimai

Shillong: Ha ka sngi saitjaiñ jong ka taiew ka Seng Samla Lawsohtun ka la pynkut ia ka taiew lehkmen kaba la tip kum ka Seng Samla Lawsohtun Youth Week 2020 Cum Charity Programme.

Ha katei ka sngi pynkut ia ka jinglehkmen u MLA ka Mylliem konstitwensi uba dei u Myntri sorkar u bah Hamletson Dohling u la long u kongsan.

Ha katei ka taiew lehkmen ka Seng Samla Lawsohtun ka la pynlong ia ki prokram bapher bapher kiba la pynshongshit ia ki khun samla jong katei ka shnong. Kaba pynkham shongshit shuh shuh ka dei ha ka sngi pynkut ia katei ka prokram ha kaba ka la don ka jingiakob thei bad rangbhabriew kaba la tip kum ka Lukhimai bad u Naikhadsaw syñnia.

Ha katei ka jingiakob u samla Kerborlang Mawlong u la ioh rah ia ka nam Nai Khadsawsyñnia , u samla Pynskhemborlang Nongbri u la wan ha ka kyrdan ba-ar bad u samla Teihok lang Nongkynrih u la wan ha ka kyrdan ba lai. Na ki kynthei pat ka samla Gardenia Shylla ka la shah jied kum ka Lukhimai, ka samla Lariti Diengdoh ka la bat ia ka kyrdan ba-ar katba ka samla Eileen Mercy Nongrum ka la wan ba lai.
La pynkut ia katei ka tamasa lehkmen da ka jingpynphuh pynphieng da ki samla jong katei ka shnong kiba la ia shim bynta ha ki jingrwai jingshad bad kiwei pat ki prokram. Ka Seng Samla lyngba u President jong ka u samla Readyon Nongrum ka la ai khublei kyrpang ruh ia u MLA uba la pyllait por khnang ban ia don ryngkat bad ban pynshngaiñ ha katei ka sngi kyrpang jong ki samla ka shnong.