Kynjah ka Sor Shillong, ba khang shnong NGT Kam ka sorkar, ba trei kam bha ki Ophis & ki Bank

Shillong, 6 Nailar:
Ka pakhang shnong ba la khot da ka seng ki trai par dewiong bad ki nongkhaii dewiong ka State Co-Ordination Committee of Coal Miners and Dealers Forum, ka la iaid beit iaid ryntih khlem don kino kino ki jingjia kiba sngewsih. Ha Jaintia Hills la iathuh ba ka jingwan poi trei ki nongtrei sorkar ka long 92% ha West Jaintia katba 30% pat ha East Jaintia.
Lah ban pynkyn maw ba ka SCOCCMDF, ka la khot ia ka pakhang shnong kum ka dak ka jingpyrshah halor ka jingshah khang tih dewiong ha kane ka jylla, kaba ka NGT ka la ong ba ka ktah ia ka mariang bad ka pynjaboh ia ki um ki wah.
Lah ruh ban pynkynmaw ba na ka liang ka sorkar, shi sngi shuwa ba ka pakhang shnong kaba la khot kan treikam, ka la pynbna ba lada jia ba ka don kano kano ka jingduh jingum katei ka seng kaba la khot ia ka pakhang shnong ka dei ban shim ia ka jingkitkhlieh kaba lah ruh ban phah siew ia ki jinglut jingsep baroh.
Ha nongbah Shillong hajan manla ki ophis sorkar, ka jingwan poi ki nongtrei ka la long hi kumba ju long man ka sngi, lait noh tang ki surok bah kiba la kham kynjah naba kim shym don ki kali kamai hynrei tang ki kali shimet la iohi ba ki iaid sharum shaneng.
Hynrei bun ki dukan ki plie bad ki kali ki iaid ban kamai ha kiba bun ki dong bad ki jaka ha sor Shillong kum ha Mawlai, Jaiaw.
Katkum ka jingkhein sorkar jylla, ha East Khasi Hills ka jingwan ki nongtrei ka la poi sha ka 91.5 percent katba ki nongtrei sorkar pdeng ki kham duna.
Ka jingwan ki nongtrei ha Main Secretariat ka la long 97 percent, la ong ka khubor sorkar bad ka jingwan trei ha ki Head Office bapher bapher ka la long 90.5 percent.
Ka khubor sorkar ka la ong ba ka jingwan kaba duna tam dei ha East Garo Hills, West Garo Hills, South Garo Hills bad ha East Jaintia Hills.
Ha East Garo Hills kiba wan trei ki long 35 percent, West Garo Hills 34 percent, South Garo Hills 21 percent bad ha East Jaintia Hills ki long 35.
Ka jingpoi trei ha kiwei ki district ka long, ha West Khasi Hills 80 percent, South West Khasi Hills 78 percent, Ri-Bhoi 55 percent, West Jaintia Hills 72 percent, South West Garo Hills 66 percent bad ha North Garo Hills 80 percent.
Don ruh ki bank kiba plie ha kane ka sngi.
Haba iakren bad u Chief Secretary u Bah PBO Warjri u la iaroh ia ka jingwan tista ki nongtrei kiba pyni ia ka jingkitkhlieh.
“Nga ai ia ka jingiaroh ia ki nongtrei, ki bank, kiba treikam kumba ju long ha kane ka sngi”, la ong u Chief Secretary.
U SP ka East Khasi hills district u Bah M Kharkhrang u la iahtuh ba ka pakhang shnong ka iaid beit khlem kano kano ka jingjia.