Pynkut ki nongniah taksi, ka Sohra Taxi Owners, ia ka jingdap 25 snem

Shillong: Ka Sohra Taxi Owners Association kala rakhe pynkut ia ka jingdap 25 snem ne ka Jubili Rupa ha Mawmihthied ha kane ka sngi Saitjain.

Haba kren ha kane ka jingialang, u bah Titosster Well Chyne u MDC ka Sohra u la long kum u kongsan.
Haba kren ha kane ka jingialang, u bah Titosster ula pynthikna ban bishar bniah na ka liang ka District Council kumno ban thaw ki lad ban iarap ia ki nongniah taksi kamai khamtam ban khang lad ia ki kali kamai nabar kumba leh ha Sikkim bad ban ialam ruh ia ki nongniah taksi kamai bad u myntri rangbah ka jylla u Conrad K Sangma halor kane ka kam. Ula ong ba ki nongniah taksi kamai ha Sohra ki dei kiba don burom, bad kam pat don kano kano ka jingujor na ki paidbah nongleit nongwan.
U bah Titosster ula kular ruh ban iatreilang bad ka seng ki nongniah taksi kamai ban thaw lad ban pynbha ia jaka ha Mawmihthied ban pynlong ka jaka ieng kali kamai.
Ula kyrmen ba ka jingrakhe 25 snem ka dei ka jingkmen bad jingkyrmen ban nang tyllun shuh shuh.
Ha kane ka jingrakhe, la sam jingsahkynmaw sha ki nongniah kali kiba dei ki nongseng. La sam ia ki da u kongsan bah Titosster, EAC Sohra kong J. Umdor, u General secretary ka EKHLTDA, bah Wandonbok Jyrwa. La ioh ia ka jingrwai na u bah Tanbor Swer uwei na ki nongrwai Khasi ba pawnam.
La pyniaid ia ka jingialang da u secretary Taxi Owners Association bah Phas Lyngdoh.