Sa 5 trok, kurup mar ka KHADC na Iewduh

Shillong, 5 Nailar:
Wat la ki pulit Enforcement ka KHADC, ki la shah thombor dang shen ha ka 25 tarik u Naitung, katba ki dang leit khynra ia ka dukan be-ain ki bar jylla kiba don ha ki bynta ka Iewduh, pynban katei ka jingshah thombor, kam shym la pynduh mynsiem ia ka KHADC bad kam shym la kynran dien ia katei ka kam ban pynkhuid ia ka jingjaboh ha Iewduh.
U EM ba peit ia ka tnad Khaii pateng ka KHADC, u bah Latiplang Kharkongor, u la ong “Ka jingjia ha ka 25 tarik u naitung, kaba ki pulit ka KHADC, ki la shah thombor kam shym la pynduh mynsien ia ka tnad, hynrei ka la nang pynshlur shuh shuh” u bah Latiplang, u la ong ba ka tnad kan ym sangeh hynrei kan dang iai bteng ia katei ka jingkhynra Laisen bad kumjuh ruh ki nongdie madan kiba shong be-ain ha ki lynti iaid kjat bad ha ki surok. U EM u la ong ruh ba ka lynti iaid kjat paidbah bad ka surok ki dei ki jaka ki ba ym don mano mano ruh ba lah ban kam trai , bad na ka liang ka tnad ka khynra bad kyndang beit khlem salia ia ki ba leh pyrshah.
Ha ka jingbteng ban leit khynra ia ki dukan madan ba kynthup ia ki khar shana bad kiwei, kiba la shah kyndang ha kine ki khyndiat sngi pynban kiba la dap biang ha kitei ki jaka, ka KHADC ka la ioh ban kurup haduh 5 trok rit ki mar tang na Iewduh bad ki bynta jong ka, Kitei ki mar kiba la ioh kurup ki kynthup ia ki shana , ki karai shet shana, ki kor suhjain, ki jain ba die madan da ki bar jylla , ki soh bad kiwei pat ki tiar.
La sdang ia katei ka jingkhynra naduh ka por 10:30 baje mynstep haduh ka por 3 baje, bad ha katei ka jingkhynra kaba sted bha, ki la don bun tylli ki dukan die madan be-ain kiba la ngat. Nalor ki dukan die madan, kiba ka KHADC ka la ioh ban khang, ki la don ruh kiwei pat ki dukan bar jylla ki bym laisen bad kiba la kut por la laisen jong ki , kiba la shah khang.
Lah ban kdew ba ha katei ka jingbteng ia ka jingleit khynra dukan ha Iewduh, ki pulit ka KHADC mynta ka sngi ki la leit biang ruh sha ka Building kaba dei trai da ka kong Deoris Marbaniang, ka lok jong u Paul Leong uba dang don ha kti ki pulit namar ka jingthombor ia ki pulit KHADc bad ki nongthohkhubor ha ka 25 tarik u naitung, bad ha katei ka jingleit khynra ia ki dukan be-ain kiba don hapoh katei ka Nichols Roy Building ka la iaid beit shakhmat khlem don shuh kiba wan pynthud.