Mynta leit kynduh Modi ka MIPRK-M, ban dawa weng tih dewiong

Shillong, 5 Nailar:
Ka kynhun jong ka kynhun Movement for Indigenous People’s Rights and Livelihood-Meghalaya (MIPRL-M) kan mih lashai ka sngi ban leit sha New Delhi ban iakynduh ia u Myntri Rang bah duh ka ri u Narendra Modi ban kyrpad ba un tuklar ban pynlait noh ia ka jingkhang tih dewiong ha kane ka jylla hadien ba la shah khang ha ka National Green Tribunal (NGT).
Haba kren sha ki nongthoh khubor ha kane ka sngi Hatmajai, u nongaiktien ka Movement for Indigenous People’s Rights and Livelihood-Meghalaya (MIPRL-M) Bah Erwin K Sutnga u la ong ba ka jingwan tuklar ka NGT ha ka jylla Meg halaya ka dei ka jingpyn khein ia ka Sixth Schedule. Haba kdew ba ka NGT ka dei ban nym tuklar ha kane ka jylla Meghalaya, u Bah Sutnga u la ong ba dei ban burom ia ka hok tynrai jong ki trai jylla katkum ka Sixth Scheduled.
U la ong ba kumba 10 lak ngut ki briew kin shah ktah ha kane ka jylla na kane ka jingkhang tih dewiong.
Halor ka jingkylli ia ka jingjot ka mariang namar ka jingtih dewiong, u Bah Sutnga u la ong ba baroh ki jingtih dewiong ne ki jingtih shyiap ha ka jylla ki ktah ia ka mariang hynrei donkam ban don ka lynti kaban iada ia ka mariang.
“Ngi lah ban sumar ia ka mariang hadien hynrei kumno ngin leh ia ki paidbah kiban iap thngan noh”, u la ong bad u la iathuh ba uwei u briew u la pyniap noh ialada dang shen ha kawei ka shnong ha West Jaintia Hills namar ka jingkhang tih dewiong ka NGT.
U la ong ba don shibun ki jaka ki kynhun bapher bapher hynrei kim shym la thaw ia kano kano ka kyndon ha kaba iadei bad ka jingkhang tih dewiong.