Diaw mynsiem ki khynnah bad samla pule halor ka Scheme Scholarship

Riki Mukhim,

Publicity Hyc

War Jaiñtia Circle

Ki khynnah bad samla pule ka jylla Meghalaya halor ka scheme scholarship ki la diaw mynsiem naka jingslem ka sorkar ban pyllait kat kum ka bhah bala mang kyrpang na bynta jongki baki dei ban ioh man la u snem .

Halor katei ka phang ki khynnah bad samla pule ki sngew kutlad ialade naka jingleh thurmur ki bor badei peit, khamtam kito ki khynnah bad samla kiba wan naka longiing baduk ba kup shiliang sem shiliang, ba ki iai ap khmih lynti bakin ioh jingiarap naka tei ka scheme hynrei ka jingap khmih lynti la pynlong pynban ba kin duh jingkyrmen naka jingbym poi thikna ka bhah ba ki dei ban ioh man la u snem. Ki kmie ki kpa ki khynnah bad samla pule tang mar iapoi ka aiom siew bai skul, bai college, thied kot, thied sla iaki khun, katno ki tmang ki jingmut jingpyrkhat hynrei hakaba kutlad tang ban ioh ban pynnang pynstad iala ki khun Kim banse wat ban bah daka ram khnang ba ki khun kin ioh ban bteng iaki jingpule jongki.

Haka jingshisha naduh ka sorkar pdeng haduh sorkar jylla ki dei ban pynleit jingmut bad buh iaki khynnah bad samla pule hakhmat, namar ki khynnah bad samla pule ki dei ka lawei ba phyrnai ka Ri ka Jaidbynriew baroh ka wei hynrei lada ka iai long kumne, shaei ka lawei ki khynnah bad samla pule jongngi. Kynmaw tang kane ka wei, lada maphi ki nongmihkhmat phi don shisha ka jingkit khlieh iaki khynnah bad samla pule, ka ri bad ka Jaidbynriew kan nang iai kiew shato phrang hynrei lada phim nang ban ñiewkor ia ki khynnah bad samla pule, ka ri ka Jaidbynriew kan jot ei naka jingleh jongphi.

Hakine ki sngi bala dep nga la wad bniah iaki daw halor ka jingslem ban poi ka scholarship ki khynnah bad samla pule hynrei naka jingwad bniah ym lah ban lap iaka daw tynrai bad wat la katta ruh ynda la wad jingtip lyngba ka website “pfms.nic.in” bad nakatei ka website ka pyni ba ka scholarship jong u wei u samla pule kaba dei ban poi haka 31.08.2019 hynrei haka juh ka column ka pyni, kam lah ban poi (failed), bad ka pyni ruh “Failure Reason: R98”.

Haba phai sha ki khynnah bad samla pule hakine ki sngi don ruh kiba la thait ban apply iaka scheme scholarship namar kat kum ba la ioh sngew iaka sur jongki, ki ong, “lut ei ka pisa bad lut ei ka por ban leit mareh shane shatai ban leit phah ai sign Affidavit shaki lawyer ne advocate, lut ei ka pisa bad lut ei ka por ban leit mareh ieng laiñ sha cyber”, katba ka bhah ba ki dei ban ioh kam ju poi thikna.

Kane ka jingiakynduh jingeh ki khynnah bad samla pule kam dei shuh ka sien kaba nyngkong hynrei kaba iai jia na u wei u snem sha u wei u snem, namarkata la sngewdei ban kyntu jur iaka sorkar ban pyrkhat thymmai kumno ban weng iakitei ki jingeh khnang baka bhah ki khynnah bad samla pule kin ioh haka por kaba biang kat kum ka bhah baki dei ban ioh lym kumta kane ka jingeh ki khynnah bad samla pule kan long pynban kum ka khlam kaba bam duh suki pa suki iaka lawei jongki.