Ki smart phone ne ki mobile phone:Ki jingmyntoi bad ki jingduh jingmyntoi haba pyndonkam iaki smartphone

Kong Linda Kongwang

Ki smartphone ki dei ki tynrai bah kiba lah ban pynkylla iaka jingim jongki briew. Kilah ban wanrah jingbha ne kilah ban wanrah jingsniew lada pyndonkam palat iaki. Mynshuwa ki briew ki ju pyrshang ban wad iaki lad ki lynti ban phah iaki shithi ne ki mesej lane ki ju thied kyrpang iaki kamera tang ban ioh shondur. Mynta iakine baroh lah ban pyndonkam daki teknoloji thymmai ban pyntylli lang hajuh haka dur jong ki smartphone. Kat nang mih ki sngi ki snem kala nangkhring iaki paidbah khamtam iaki khynnah samla kane ka juk mynta. Dei namar kata haduh kine ki sngi kipor mynta ka mobile phone kam ju jah naka met jong u briew.
Katkum ka jingiohlum jingkheiñ, la kumno kumno shiteng naki nongshong shnong ki don laki jong ki smartphone. Ha u snem 2016, ka jingwadbniah bala pynlong daka Bank jong ka America ki iathuh ba palat 96% ki khynnah samla kiba pyndonkam iaki phone ki ong baki smartphone ki long kiba donkam bha naka bynta jongki, ki kdew ruh ba ki long kham kongsan ban iaki jingsleh ne ki brut shut bniat jongki. Ki nongwadbniah ki shem ruh ba manla u wei pa uwei u briew u ju peit ne khmied iala ka mobile phone jan man la ka 5 minit.

Kampher, baroh kine ki don laki jong ki jingmyntoi bad ki jingduh jingmyntoi. Ha kane ka bynta ngin peit bniah kiei ki jingmyntoi bangi ioh naki smartphone bad ha kajuh ka por kiei ki jingduh jingmyntoi naka jingpyndonkam palat iaki mobile phone.

KI JINGMYNTOI HABA PYNDONKAM IAKI SMARTPHONE

1. AI JINGTIP KLOI :—– Ka mobile phone ka khambha shibun ban ia kiwei ki lad ai jingtip. Namar kata la shna khnang iaka ha kata ka rukom ban pynsuk iaki paitbah ban ioh kren ne ai jingtip kloi lada don kano kano ka jingjia. Ka jingmih ki teknoloji bapher bapher haki mobile phone ka pynsuk iaki rukom treikam kum haba phah iaki mesej ne ioh pdiang kloi iaki mesej, ban leh video call bad ki apps bapher bapher kiba ailad iaki briew ban pynphriang iaki Khubor sawdong ka pyrthei.
2. BAN WAD JINGTIP NAKI WEBSITES:—- Ka smartphone kalah ban dei kaba biang naka bynta ban wad jingtip ne ban khmih ia kiei kiei kiba donkam haki website. Ka jingwad jingtip haki website lyngba ki mobile phone kan pynsuk ban wad jingtip ha kano kano ka por bad ha kano kano ka jaka. Katkum ki jingwad bniah la shem ba 10% ki por bala pyllut daki briew haki mobile phone jongki, ki pyndonkam ban plied iaki web browsers ban tteikam haki internet. Dakaba leh kumne kan pynsuk iaki briew ban ioh jingtip kloi kaba ki donkam.
3. KA JINGPYNDONKAM IAKI KAMERA HAKI MOBILE:— Hakane ka juk ‘selfie ‘ ne ka jingshondur dalade ialade, ka kamera haki mobile phone kadei kaba donkam eh. Ka iarap pyllait iaki briew nakaba thied la ki jong ki digital kamera ban ioh shondur ne ban ring video. Khamtam hakine ki por kiba mynta, ki khynnah samla ki sngewtynnad bha ban phah ne pyni iaki dur haki social media. Katkum ka jinglap jongka Comtech study ha u snem 2014, ka kamera ka don haka kyrdan kaba Lai kum ki jingpyndonkam ba kongsan eh naka bynta ki nongpyndonkam haba thied iaki mobile phone. Bad kine ki smartphone kidei radbah kiba pynthikna baka phone baki thied kadei ban don iaki kamera kiba bha tam.
4. KA JINGPULE PUTHI LYNGBA KI MOBILE PHONE:— Ka mobile phone ka dei ruh ka shlem iarap naka bynta ban pule ne ban hikai khamtam iaki khynnah pule. Bad daka jingiohlad kaba suk ban ioh lum jingtip shaphang ki jingpule kiba don haki website, ki khynnah kin kham lah ban pule bha lyngba ki jingioh peit iaki rukom pule ne rukom hikai bad ruh da kaba pyndonkam ban bud iaki rukom hikai lyngba ki video haki mobile. Kilah ruh ban twad jingmut naki internet lada ki kwah ban wad jingtip eiei shaphang ka sobjek ba ki donkam.
5. KI JINGPYNBYRNGIA:— Ia ki smartphone la shim ruh kum ki tynrai jongka jingpynbyrngia— kum ki jingialehkai, ki jingrwai, ban peit phlim ne ban pule kot ne khana. Katkum ka jingioh lum jingkheiñ ha u snem 2016, ki don palat 63.7 million ngut ki briew ki pyndonkam iaki smartphone jongki ban pynbyrngia ialade hiki jingialehkai kiba bunjait. Nalor kata kilah euh ban sngap iaki jingrwai baki sngewtynnad bad kiwei kiwei ruh de. Ban pynbyrngia ialade kan pynsuk iaki lada kin ban pyndonkam da ki smartphone.
6. KA JINGDON KI APPS KIBA LAH BAN PYNDONKAM SHIMET:— Ka smartphone kalah ban iarap palat ban ia kiei kiei ki jingdonkam da ki jingiarap jong ki apps bapher bapher. Ki don palat 2 million tylli ki apps kiba lah ban pyndonkam haki Google Play Store bad haki Apple Apps Store. Ka jingtreikam jong kine ki apps ka iapher na kawei sha kawei pat. Haka smartphone pii lah ban leh kiei kiei kiba phi kwah khlem ka jingtip kiwei pat. Ban lait naki jingpyndonkam bakla da kiwei iaka mobile phone jongphi, ban buh daki password kalong kaba donkam khmang ba kin ym iohi kaei ba phim kwah ban pyni ha ki. [yn dang bteng]