Kyntu ki nongrep ia ka KHADC, ban nym khang pynhap mar ha basa jhur

Shillong, 30 Naitung:
Ki nongrep nongpyn iaid ia ka basa jhur ha Iewduh, ki la kyntu ia ka Executive Committee (EC) ka Khasi Hills Autonomous District Council (KHADC) ban nym khang ia ki kali ban pynhap mar ha basa jhur.
Ha ka jingiakren u Rupang bad ki nongpyn iaid ia kane ka basa bad ki nongrep, ki la ong ba ka la don ka jingong ha kine ki sngi na u Chief Executive Member (CEM) ka KHADC u Bah Ardent M Basaiawmoit ban nym shah shuh ban pynrung kali ha basa jhur. “Lada ka District Council kan khang ban rung ki kali kit mar rep ban wan pynhap mar ha basa jhur,kan long ka jingeh ia ki nongrep namar ba ka bai daju kan rem ban pynhap sha jngai ban wankit pat da ki daju sha kane ka iew”, la ong kiba pyniaid ia kane ka basa jhur.
Kine kiba briew kiba peit bad pyniaid ia kane ka iew jhur, ki la kyntu ia u Syiem Mylliem bad ka EC ba ialam da u Bah Ardent M Basaiawmoit ba kin shah ia ki kali ban rung sha basa jhur ban pynhap ia ki mar rep bad kin mih mar ia dep kumba ju long.
“Kumba ju long, ngi shah ia ki kali ban wan pynhap ia ki mar rep bad mar ia dep, la beh noh na kane ka basa ban lait na ka jingkhapngiah”, la ong uwei uba pyniaid ia kane ka iew.
Ha kajuh ka por, ki la ong ba ka jingkhang ban shim khajna hapoh 50 kilo, ym dei ban shim khajna hynrei kane ka la buh jingeh ia ki nongkhrong musur namar ba ia ki soh bad ki jhur don kiba la song ha kriah kaba don tang 30 ne 40 kilo namar ba la long kumne kin hap pynlait khrong khajna watla ki wanrah bun kriah ruh. “Kane ka la long ka jingeh ia ngi ban shim khajna namar ba ki soh ki jhur kiba la thep ha kriah watla ki don bun kriah hynrei namar ba kim don 50 kilo”, la ong uwei u nongkhrong musur. U la ong ba ka jingkhrong kam dei kaba heh namar ba la shu shim ka dor kaba rit bha na ki nongrep bad u la ai nuksa, shi byrni pastik u piskot, la shu shim tang T. 5.
“Kane ka dei kawei ka jingeh bad kyrpad ia ka KHADC ba kan shah ban shim musur kaba rit na kine ki kriah, u la ong shuh shuh.
Ha kane ka sngi Nyngkong, u Bah Basaiawmoit u la ong ba la rai ba ha basa die jhur, yn nym shah shuh ban pynieng kali bad bad baroh ki jhur ne ki mar rep, kiba duna ia ka 50 kilo, ym dei shuh ban shim khajna na u Syiem Mylliem. Kane ka jingrai jong ka KHADC bad u Syiem Mylliem ka long shi bynta ban pynkhuid noh ia ka Iewduh ban wanrah kumba long ha ki por mynshwa.