Shillong: Ka kynhun Touchline North East Basketball, ha ryngkat ka Meghalaya Aids Control Society, kin sa pynlong ia ka lympung ialeh kai Basketball ka ban sdang ha ka 30 tarik mynta u bnai Kyllalyngkot haduh ka shi tarik u bnai Rymphang ban wan mynta u snem 2020 ha Madan Basketball jong ka madan Iewrynghep, Laitumkhrah Shillong.
Ki rang bad ki thei ialehkai Basketball jong kane ka jylla, ki sa ioh lad ban sakhi ia kawei ka lympung iakob lehkai Basketball kaba ialehkai tang shiteng madan bad tang 3 ngut ki nongialehkai shi sien ialehkai na kawei ka kynhun ia kaba la tip kum ka North East 3X3 Challenge 2019-2020.
Ia kane la pynbna da ki dkhot jong ka kynhun Touchline North East Basketball,haba kren ha ki nongpathai khubor haka 27 tarik mynta u bnai Kyllalyngkot 2020 ha Shillong Press Club.
Ha kane ka lympung kin don haduh 60 tylli ki kynhun ki ban iashim bynta, ba kynthup ia ki 26 tylli ki kynhun jong ki Shynrang, 10 tylli jong ki kynthei, 16 tylli ki kynhun jong ki khynnah shynrang kiba hapoh ka 16 snem ka rta bad 8 tylli ki kynhun jong ki khynnah kynthei kiba hapoh ka 16 snem ka rta.kin don ruh ki kynhun ia leh kai ki ban wan na shabar ka jylla.
Phi don ban ong eiei?