Shah rahbor u khun u heh pulit

Shillong, 30 Naitung:
Ka jingshah rahbor ki nonghikai ha Ri-Lum Garo ka dang iai bteng haduh kine ki sngi ruh, ha kaba mynta ka sngi balang ki kynhun lehnoh kiba la suba jur ba ki dei ki lehnoh ANLCA ki la rahbor sa ia kawei ka nonghikai skul na kaei ka shnong kaba don ha north Garo Hills District.
Katei ka nonghikai ka dei kab ala tip kyrteng kum ka Sandai Sangma, 30 snem karta, ka la shah rahbor ha ka por ba ka dang don ha ka Scooter jong ka ha kaba ki lehnoh ki la pynap pynap suloi ia ka ha Dokasaram,kaba don hajan Resubelpara kaba jngai kumba 120 kilomitar na ka sorbah Tura. Katei ka jingjia ka la jia ha ka por 1:30 baje nohphai sngi.
Kynthup ia katei ka nonghikai tang hapoh u naitung ka jingshah rahbor ki nonghikai ka la poi sha ka 3 ngut, ki bor pulit ki la iathuh ba la la lap ia ka Scooter jong katei ka nonghikai najan Dokasaram, bad ki pulit ki la suba jur ba dei ka ANLCA kaba la leh ia kane ka kam. Halor katei ka jingjia, na ka liang ka North Garo Hills Primary School teachers Association ka la pynrem jur ia katei ka jingshah rahbor ka nonghikai skul.
Ha kawei pat ka jingjia, u khun jong u Sub Inspector CK Marak u Tennybirth Momin, 27 snem karta u la shah rahbor na Domeanti najan Resubelpara , North Garo Hills ha ka sngi u Blei, ki pulit ki la ong ba ki nongrahbor ki la dawa haduh T.15 lak tyngka ban pyllait ia u khun utei u heh pulit.