Kiew ka jingiap sha ka 56ngut ha China, na ka pang kynsha

Ka jingpang kynsha ha China Coronavirus, ka la pyniap ia 56ngut ki briew haduh mynta, ha kaba ki la don kiba iap haduh 15ngut ha ki 24 kynta ba ladep, ong ka khubor. La iathuh ruh ba kito kiba la ioh ia katei ka jingpang, ki la poi mynta sha ka 2hajar ngut.

La iathuh ba katei ka jingpang, ka la nang pur mynta sha Hong Kong, ha kaba ki don ar ngut kiba ioh ia katei ka jingpang ha Macao bad sa lai ngut ha Taiwan. Nangta ka la pur ruh sha Thailand, Japan, South Korea, US, Vietnam, Singapore, Malaysia, Nepal, France bad ha Australia. La iathuh ba uwei u briew, ula ioh ia katei ka jingpang ha Canada bad utei u dei uba dang shu wan phai na China.

U President Xi Jinping, hynnin ka sngi, ula ong ba katei ka jingpang, ka dei kaba shyrkhei shibun bad u la pynpaw ia ka jingdonkam ban teh lakam mardor ia ka jingkhlain bor jong katei ka jingpang.