Trei tyngeh ka jingpang kynsha ha China, iap 25, kem pang 830ngut

Ka jing pang kynsha kaba la khie ha ki khyndiat sngi ha China bad kaba la pyntriem ia ka pyrthei baroh kawei, kaba la tip kum ka coronavirus, ka la bam ia 25ngut ki mynsiem briew bad nangta sa kiba ioh ia katei ka jingpang, ki la kot sha ka 830ngut haduh mynta ka sngi.

Ka China, ka la eksamin ia 20 million ngut ki briew ha ka nongbah Wuhan, namar ba katei ka jingpang, ka dei kaba triem shi katdei bad kaba lah ban pur stet sha ki bynta bapher jong katei ka Ri.

Katei ka jingpang, ka long kum ka jingpang pneumonia, kaba la pyniap ia 25ngut, ba kynthup ia 24ngut ha ka jylla Hubei jong ka China bad sa uwei ha Hebei.

La iathuh shuh shuh ba ki don mynta 830ngut kiba la thikna ba ki don ia katei ka jingpang lane kaba la tip kum ka coronavirus (2019-nCoV) bad katei ka jia ha ki 29 tylli ki jylla bapher jong ka China.

Ka Beijing, ka la khang ia ki jing ia lum paidbah naduh ki jingleit mane blei ha ki temple bad kiwei ki jaka ia lum paidbah ha ka shuti snem thymmai jong katei ka Ri, ka ban long ha ka Sngi Saitjain. Ka sorkar China, ka la khang ia ki briew ban mih na ka nongbah Wuhan, kaba dei ka jaka kaba bun eh kiba ioh ia katei ka jingpang.