Jah rngai u heh ka NSCN IM

Kohima: Katba ka ka jing iakren iasuk hapdeng ka National Socialist Council of Nagaland (NSCN) IM bad ka sorkar India ka dang iaid shakhmat hynrei ka jing bym poi uwei u nong ialam ba rangbah ka NSCN (IM) u Phungting Shimrang ka la wan rah bun jing kylli na bun ba lang.

U Phungting Shimrang u ba dei ruh u Commander-in-Chief barim ka NSCN (IM) u ju iadon bynta lang ban iakren iasuk bad ka sorkar India naduh ki por mynswa hynrei naduh u nailur 2019 u khlem don bynta shuh ban leit sha nongbah Delhi ban ia shim bynta ban iakren iasuk bad ka sorkar India.
Ka la don ka jing mih khubor ba u Phungting Shimrang,u lah ban don sha Yunnan province ha ka ri China na ka bynta ban pan jing iarap ban iakhun pyrshah ia ka sorkar India.
Na ka liang u Thuingaleng Muivah u nong ialam ba khliehduh ka NSCN (IM) ruh u khlem la ban pynshai halor ka jing jah u Phungting Shimrangu na ka jing ia kren ia suk bad ka sorkar India.
Kumba shu pynkynmaw ka NSCN (IM) ka la dawa na ka sorkar India ba ka dei ban ai ia ka Nagaland la ka jong ka lama, ka ing bishar bad ruh ia ka riti synshar, hynrei haduh mynta ka sorkar India ka khlem pat phah jing tip halor kine ki jing dawa na ka liang ka NSC (IM).
Na ka liang ki paidbah ka Nagaland ki don ka jing mut ba u khliehduh ka NSCN (IM) U Thuingaleng Muivah u don jing mut ei ei sha lyndet haba dei bad ka jing jah u Phungting Shimrangu ban ia shim bynta lang ha ka jing iakren iasuk bad ka sorkar India.
Kane ka jing jah u Phungting Shimrangu ka lah ban buh jing eh ia ka sorkar India lada kam lah ban pynurlong ia ki jing dawa ka NSCN (IM).
Lah ban pynkynmaw ba ha u snem 2011 ki pulit ka jylla Nagaland ki la ioh kem ia kawei ka briew na China kaba kyrteng ka Wang Qing kaba trei kum ka People’s Security Bureau jong ka ri China hadien ba ka la ia kynduh ia u Thuingaleng Muivah. Kane ka jing jah u Phungting Shimrang ka lah ban kdew ruh ba u khliehduh ka NSCN (IM) u Thuingaleng Muivah u mut ban pyndonkam ia u Phungting Shimrang ban pan jing iarap na ka China lada ka sorkar India kam lah ban pynurlong ia ki jing dawa ka NSCN (IM) namar ba uwei u nongialam ba rangbah ka NSCN (IM) u Hangshi Ramson Tangkhul u dang rieh tngen ha mynmar ryngkat ki shipai ka NSCN (IM).