San ngut shah pynbam drip, ki Grade IV ba shah thngan

Shillong, 28 Naitung:
San ngut napdeng ki 42 ngut kiba shah thngan ki la shah pynbam drip ha Civil Hospital Shillong mynta ka janmiet; hadien ar sngi ba ki la pynlong ia ka jingshah thngan. Hyn rei kine ki san ngut, ki la wan phai biang sha jaka pynlong shah thngan ha Madan Jingkieng Nong thymmai hadien ba la shah pynbam drip.
Kitei ki 42 ngut kiba shah thngan haduh mynta ki dang bteng ia ka jing shah thngan naduh hynnin ka sngi haduh mynta namar ba ka sorkar kam pat ai jubab eiei ia ki. Kine ki Grade IV ki la sdang ia ka jingshah thngan naduh hynnin mynstep ka sngi Nyngkong baroh shi miet da kaba iashong kyrain ha jaka ha syndah ka Indoor Stadium ba la da da ka turpar.
Kine ki Grade IV ki ia rai ban shnong bad miet bad sngi haduh ba kin da ioh ia ka jubab na ka sorkar ba ka thep kam noh ia ki baroh 42 ngut.
“Ngin shong shah thngan beit hangne, katba ngim pat ioh ia ka jubab”, la ong kiba shah thngan.
Lah ban kdew ba napdeng 331 ngut ki samla kiba pas ia ka eksam DSC ha u snem 2011, 289 ngut ki la ioh kam katba 42 ngut ki kynthei kim pat ioh watla ka por pynjlan ba ka sorkar ka ai por ia ki kan kut noh lashai ka sngi.
Kitei ki 42 ngut ki bym pat ioh kam baroh kidei ki kynthei suda ki la pynlong hynne ka sngi ia ka jingshah thngan ba khlem buh por ban dawa na ka sorkar ba ka dei ban thep kam noh ia ki.
Kine kiba pas ia ka eksam DSC hynne ka sngi ki la pynlong ia ka jingshah thngan ha ka madan jingkieng Nongthymmai.
Iwei na kiba pas ia kane ka eksam DSC, ka Kong Paskalina Lyngdoh haba kren mynta ka sngi ha katei ka jaka shah thngan ka la ong ba katkum ka jingtip ka la iathuh ba bun ki kam ba lait ha ki tnad sorkar kum ha Veterinary, Education, Agriculture bad ha kiwei kiwei ki tnad hynrei ka sorkar pat kam thep kam ia kid a kaba aidaw da kumne kumtai.
“Ki la ai dawa ia ngi ba ki hap ban thep ia kito kiba hap pynkynriah kam na kiwei ki District bad ban pynskhem ia ki nongtrei Reserve Casual Workers (RCW)”, la ong ka kong Lyngdoh.
Ka kong Lyngdoh, ka la ong ban a ka liang jong ki kin pynlong beit ia kane ka jingshah thngan ba khlem buh por haduh ba ka sorkar kan kular ban thep kam noh ia ki baroh.
Katkum ka jingiathuh ka kong Lyngdoh la ong ba ka jingpynjlan por 6 bnai jong ka sorkar kan kut noh lashai ka sngi hynrei kim pat ioh jubab eiei na ka sorkar haba ki ladep ai jingthoh sha ki myntri sorkar bad sha u Deputy Commissioner ka East Khasi Hills ruh.
“Ngin shong shah thngan beit hangne katba ka sorkar kam pat ai ia ka jubab” , la ong Kong Lyngdoh bad la bynrap ba ngi la sdang ia ka jingshah thngan naduh ka 10 baje mynstep hynne ka sngi Nyngkong.
Napdeng kine kiba shong shah thngan don kiba la don khun don kti bad ki la iathuh ba ki la hap ban shu ieh kumto ia la ki khun ki kti bad don ruh kiba don ha ka pang ka shitom ki bym lah ban wan ban don bynta lang hangne.