Ka la dei ia u CEM bad u Chairman ka KHADC ban pyllait ia kane ka jingiatyngkhuh lada phai sha ki kyndon ain

Ka Rule 20 (1) jong ka AD Rules, 1951 ka kren shai kdar kumne – “The Chief Executive Member shall be elected by the District Council and the other Executive Member shall be appointed by the Governor on the advice of the Chief Executive Member from amongst the members of the District Council.” Kumta, ka approval na u Governor kam donkam ia u CEM ba la jied da ka Council.

Kaba hap ban pyntip sha u Governor hadien ba la jied ia u CEM bathymmai hadien ba la pynkhyllem ia ka Executive Committee katkum ka Rule 22 (2) ka dei tang ka jingpynpoi ia ka report sha u Governor ba la dep jied ia u CEM hapoh jong ka 48 kynta hadien ba la pynkhyllem ia ka Executive Committee namar lada ym pyntip mardor sha u Governor ba la dep jied hapoh 48 kynta, u Governor u la dei ban thung hi ma u ia CEM bad ia uwei ne ar ngut ki EM, kata, ba kam dei na ka bynta ba u Governor un ai approval ia ka jingjied ia u CEM. Nga la shah jied CEM la ar sien ha KHADC bad ngam ju hap ban ap ia ka approval na u Governor, hynrei na Council Hall la ia synran da ki para MDC beit beit sha ka kamra u CEM bad sdang ban treikam kum u CEM, kata, kaba shim por hapoh shi kynta hadien ba la khot ia u Secretary ka EC bad ki Officers; kaba nyngkong eh ka long ban phah noh ia ka kyrteng ki EMs sha u Governor.

Kumta, ka la pynpaw ia ka jingbakla bakhraw na ka liang u Chief Minister bad ia u Deputy Chief Minister kiba la pynbna ba ym don CEM ha KHADC.
Ka jingphah ia ka jingpyntip sha u Governor lyngba ka DCA ka dei tang ka rukom (Convention) haba ia dei na ka juh ka Party, bad kata kam long ain, naba ka ieng hi ka ain kaba da thoh [20 (1) lane 22 (2)].

Ka jingpynmih ia kane ka jingthoh ka dei namar ka Dorbar banyngkong jong u snem 2020 katkum ka Rule 36 (3) ka dei ban shong ha kaba sdang u bnai March 2020, kumta, u bnai February 2020 u dei u bnai ba ka Executive Committee ka dei ban pynkhreh bad pynbit pynbiang ia kiba bun kiei kiei kiba dei ban rah sha ka iing Dorbar, kum ka KHAD (Khasi Social Custom of Clan Administration) Bill, 2018 kaba la dei ban phah biang sha u Governor ba un ai noh ia ka jingmynjur hadien ba ka iing Dorbar (Distrtict Council) ka la lah ban pynshai ia ki hynniew tylli ki mat ba u Governor u la phah ha ka Message jong u sha ka KHADC naduh u snem 2019; la ar sien shong Dorbar khlem pat lah ban rah, te kumta ha kane ka Dorbar ha u March 2020 la dei ban pyndep ia kane ka kam bad ia kiwei kiwiei ruh.
Hynrei haduh mynta ka KHADC kam don Executive Committee, kata, don tang u CEM marwei, bad kat kumba ka la paw ha ki kotkhubor ruh, ki MDC kiba don bad u CEM Bah Latiplang Kharkongor ki la don sa tang 12 ngut lait noh u Chairman, katba na ka liang ka UDA ki la kam ba ki don 16 ngut ki MDC da ka jingleit kyrshan I MDC jong ka Nongshken Constituency bad Mairang Constituency.
Haba phai sha ka jingiatyngkhuh kaba don mynta ha KHADC kan shu sah kumne kumba ka long mynta, khlem Executive Committee! Kumta, ka la dei ia u CEM bad u Chairman ka KHADC ban pyllait ia kane ka jingiatyngkhuh lada phai sha ki kyndon ain, hynrei haba phai sha ka ain kaba hajrong duh ha ka Ri synshar-paidbah dei ban burom nyngkoh eh ia ka Democratic Principle, kata, shisien ba la duh ia ka majority, long katba long, dei ban aiti noh ia ka jingsynshar da kaba suk jai ha kata ka kynhun kaba don ia ka majority.
U Chief Minister bad Deputy Chief Minister ki la bakla tyngeh ban pynbna ba ym don CEM ha KHADC, hynrei ka jingbat jubor ia ka jingsynshar haba la duh ia ka majority kan long kaba kham palat shuh shuh, khamtam haba ym long ne lah ban trei ia kano kano ruh ka kam. Ka KHADC ka la dei ban ioh ia ka Executive Committee bapura shwa ban mih u bnai February 2020 la ka long ha kano kano ka dur. Ban buh hi da u Administrator kam long kaba itynnad, ka dei hi ka hok ki MDC ban synshar.
HS Shylla