“Shibnai hap ai laisen ka KHADC ia 9tylli ki dukan” Pynshai ka kong Deoris, halor ka jingkhynra ka KHADC

Shillong, 27 Naitung:
Halor ka jingjia, kaba ha ka sngi thohdieng ba ladep, ha ka jingshah shoh jong ki pulit ka District Council, ka kong Deoris Marbaniang, ka pynshai, ba kat kum ka rai jong ka kashari, ha ka 10tarik Naitung 2014, ka District Council, ka dei ban plie ia 9tylli ki dukan hapoh ar taiew bad ba ki bar Jylla, kiba don hangtei, ba ki dei ban don da ka laisen khaii pateng bad ba ka Council, kan ai hapoh shi bnai.
Halor katei, ka Council, ka la plie ia ki 9tylli ki dukan, ha ka 15tarik Naitung 2014, katba kum ka hukum jong ka kashari, hynrei, la iathuh ba ki pulit jong ka District Council, ki la leit khynra ia ki dukan jong ka kong Marbaniang bad ba kin pynjot bad shim lut ia ki tiar ki tar jongka.
La iathuh shuh shuh, ba ha ka jingujor, kaba la phah sha ki pulit Lumdiengjri bad kham hadien sha Sardar Police Station, hynrei, ym shym la leh eiei satia bad ka kong Marbaniang ka ong “Nga sngew lyngngoh, ba katei ka jingjia, ka leit jia kumtei ha katei ka 25tarik Naitung 2014, ha kaba la pynmih ruh tang shiliang ia ka jingshisha”.
Ka kong Marbaniang, ka ong shuh shuh, ba u khun jongka, U Kimfa Marbaniang, ula phah ia ka jing ujor jongu ia kaba ym shym la leh eiei, katba ia kiwei pat ki jingujor na ki saw tylli ki kynhun, la pyntreikam mardor bad ka kong Marbaniang, ka ong “U khun jongnga lei U Kimfa, u don satia ha katei ka jaka ba jia ruh, hynrei, la shu kynnoh bakla ia u, tang namar ba u leit ban ujor sha ki pulit”.