Pynsahngeh ka EC, ia ka jingshna ia ka iing dorbar ka KHADC

Shillong, 27 Naitung:
Ka jingshna ia ka Legislative wing ka Khasi Hills Autonomous District Council (KHADC) kaba la mang T.4 klur la pynsah ngeh noh da ka Executive Committee (EC) thymmai ba la ialam da u Bah Ardent Miller Basaiawmoit hadien ba la lap ba ka jingshna ia katei ka ophis treikam kam long kaba skhem.
Katkum ka jingtip ba la ioh la iathuh ba ka kaiphod jong ka komiti kaba tohkit ia ka jingtei ia katei ka iing ophis ka KHADC Legislative wing la dep aiti sha ka EC. Hynrei na ka liang ka EC kam pat kwah ban shu shim kam noh hak dak bad ka kwah ban tih kham bniah shuh shuh ia ki jingdkoh ka rukom tei ia katei ka ophis.
Namar kane ka daw ka EC jong u bah Basaiawmoit ka la phah pynlong ia ka jingtohkit kham bniah ia katei ka ophis.
Ia katei ka Legislative wing ka KHADC ba la ialam da ka EC barim hapoh ka jingialam jong u Bah Pynshngain Syiem. Ka EC barim ka la aiti ha u Kontraktor u DG Marbaniang ban shna ia katei ka ophis khlem da khot tender bad khlem da pynbiang ia ki dur ki dar4 ha ka rukom kaba biang.
Kane ka projek kaba la mang haduh T.4.74 klur na bynta ban shna ia katei ka ophis hynrei ka long kaba lyngbgoh ba ka jingai kontrak kam long kaba shai bad khlem da khot tender, la ong ka tyllong khubor na District Council.
Kane ka jingleh jong ka EC kaba rim ka la pynlong ia ka EC ba thymmai ba kan wad da kaba thung ban pynlong biang ia ka jingtohkit namar ba ka iing kaba shna kadei ban long kaba skhem ym ban shu shna torti.