Ka ULFA ka hikai ia ka GNLA ban thaw bom IED:DGP

Shillong, 27 Naitung:
U Director General of Police (DGP) u PJP Hanaman u la ong ba dei ka seng lehnoh ULFA kaba ai ia ka jinghikai bad ka jingkyrshan ia ka GNLA ban thaw ia u bom Improvised Explosive Devices (IEDs).
“Ngi la ioh ia ka jingtip kaba bniah ba ka ULFA ka la ai jinghikai ia ki dkhot ka GNLA ban shna ia u bom IED. Ka ULFA ka la ai jinghikai ruh ia ki dkhot ka GNLA”, la ong u Hananam ha ki nongthoh khubor haba kren ha kane ka sngi Saitjain.
Katkum ka jingong u DGP, u heh ka ULFA u Drishti Rajkhowa u la don ha jaka hikai ia ki GNLA bad u dei uba donkti ban leh ia ka jingpynbthei bom ha kane ka sngi Thoh dieng ha kaba ar ngut ki pulit ki la kyllon iap.
U la ong ba kumba 15 haduh 20 ngut ki dkhot ka ULFA ki don ha ktem ka GNLA ban ai jinghikai bad ki pyndonkam ruh ia ka lynti iaid na Durama-Bajengdoba.
“Kane ka jingtip ba la ioh, kan pynlong ia ki pulit ban kham pyntbit ia ka jingtreikam ha ka thain Garo Hills”, la ong u DGP.
U la iathuh ruh ba ha ka jingkhynra jong ki pulit ha ktem basah u Commander-in-Chief ka GNLA u Sohan D Shira hajan Nengsang Adugre ha Durama Hills , ki pulit ki la ioh ban kurup ia ki tiar kiba buh por kiba pyndonkam ban shna ia kine ki bom.
“Nalor ka jingshna ia u IEDs, ki GNLA ki shna ruh ia ki tiar ba lah ban pynbthei na jngai”, la ong u DGP.
Ha ka jingjia ha kane ka sngi Thohdieng, u la ong ba lai ngut ki pulit la khlad hadien ba la shah pynbthei bom ha ki lehnoh GNLA. U Bah Constable Arphius Khymdeit u la khlad mar ia poi ha Tura Civil Hospital, u nongniah u Lembartu Suchiang u la khlad ha ka por ba shah sumar katba u Officer in-charge ka Rongram PS u Rahul Marak u la khlad na ka jingmynsaw ha jaka sumar ha Guwahati ha kane ka sngi Saitjain.
Katkum ka jingong u DGP, ka GNLA hapoh ka jingialam jong u Area Commander ka West Command u Baichung bad u Jarek ki la leh ia katei ka kam ban hiar thma ia ki pulit bad kane ka pyni ba ki treikam ha ka thain Tebronggre ar sngi shwa ba kin wan hiar thma. Halor kane ka jingjia, u DGP u la ong ba la shim ia ki lad ki lynti ba kham husiar ha kaba baroh ki police station kin peitngor bha ia ka jingiaid pahara. U la ong ba ha kane ka sngi Thohdieng, ki pulit ki la pynlong ia ka jingiaid pahara ha ka iew ha Tebronggre namar ba don ki nongkhaii. U la ong ba ka jingrahbor la leh ruh da ka jingiatreilang ka GNLA bad ka ULFA. Ki pulit ki la ioh jingtip ba ki lehnoh UFLA na Assam ki la rahbor ia ki briew da kaba buh ha ktem ka GNLA. Ha kajuh ka por, ka sorkar ka la ai jingiarap kyrkieh mar T. 1 lak sha kiba haiing jong kito ki pulit kiba la khlad noh ha ka jingshah hiar thma ha ki lehnoh. U DGP u la iathuh ba baroh ki longing kin ioh ka jingburia kaba T. 7.5 lak na ka sorkar.