Yn iarap pisa shongkurim, ka sorkar ia ki khunswet

Shillong, 27 Naitung:
U Myntri Rangbah ka jylla u Dr. Mukul Sangma u la pynbna ba shen ka Sorkar kan sa pyntreikam ia ka skhim Chief Minister`s Wedding Assistance Scheme (CM WAS) ban ai jingiarap sha kito ki samla kynthei khunswet ha ka shongkha shongman.
U Myntri Rangbah u la pynbna ia kane ha Mylliem ha ka jingialang pynrung kyrteng ban ioh jingmyntoi na ka Chief Minister`s Social Assistance Scheme kaba la ai sha kiba duna bor pyrkhat, kiba duna dkhotmet, ki thei iap lok ha ka jingialang kaba la long ha Baniun kaba hap ha Mylliem C&RD Block, East Khasi Hills District. Ha kane ka jingialang la iadonlang ruh u Bah Ronnie V. Lyngdoh, Government Chief Whip, uba long ruh u MLA ka Mylliem Constituency, u Bah Kennedy Khryiem, MLA, i Kong Teilinia Thangkhiew, Chairperson ka KHADC iba long ka MDC ka Mylliem Constituency, Bah H.M Shangpliang, Director ka Social Welfare bad kiwei kiwei. Ka Chief Minister’s Social Assistance Scheme la pynbna paidbah ha u snem 2012 ha Asanang, West Garo Hills. Lyngba kane ka skhim, la ai jingiarap T.500 shibnai sha kito ki nongiohbhah. Na ka bynta ki briew kiba duna dkhotmet ym don jingkhein satia ia ka rta, kynthup ia ki thei iap lok, hynrei na ka bynta kito kiba duna ha ka bor pyrkhat, ki kynthei ki dei ban don 58 snem shaneng katba u rangbah un dei ban don 60 snem ka rta.
Haba kren ha kane ka sngi, u Dr. Mukul Sangma u la ong ba ka jingpynbna paidbah ia ka CM’s Social Assistance Scheme ka long ban pyni ia ka jingbat kular ka Sorkar ban pynmyntoi ia ki paidbah. U ong ba ka Sorkar ka la mang pisa tam ruh sa 10 klur na ka bynta kane ka skhim. U Dr Mukul u la pynpaw ruh ba ka Sorkar ka la shimkhia ban kyntiew ia ka ioh ka kot ha ki thain nongkyndong bad ha kajuh ka por u la pynbna ban pynurlong ia ki Cluster Development Project lyngba ka Livestock Mission ha kaba u la iathuh ba lyngba kane ka skhim, la buh thong 5 hajar tylli ki longing ban iarap na ka bynta ka ri masi bad kane kan iarap ban pynbun ia ka jingpynmih ia ka Dud bad ban pynkha ia kiwei kiwei pat ki lad kamai. U Dr Mukul u la sam ruh ia ka Application Form sha ki nongioh bhah ha kane ka jingialang.