Mynsaw jur 2 ngut, julor 3 ki kali rit bad kawei ka dukan ba rat ka kali kit Gas

Nongpoh: Ha kawei ka jingjia aksiden kaba la jia myn hynnin ka janmiet hapoh ka surokbah NH-6 ha Ri Bhoi, arngut ki rangbah ki la mynsaw jur, Lai tylli ki kali rit ki la julor bad pynjulor ruh ia kawei ka dukan, hadien ba ki la shah syllad ha kawei ka trok kaba dei ruh ka kali kit Gas, kaba kiew na ki thain Guahati sha Shillong.

Katei ka jingjia, ka la jia ha ka por 2:30 baje ei ei janmiet, ha kawei ka kaba kaba kham long khongdong (Turning) shawa ban poi Sumer haba kiew sha Shillong, ha kaba katei ka trok kit gas kaba don ia u number AS-06-F-9087, ia kaba la suba ba ka la kham pynher stet, ka la leit ban rat naphang ia kiba don harud katei ka jaka, tad haduh ba ka la wanrah ia ka jingmynsaw ia arngut ki briew, 3 tylli ki kali rit lem bad ia kawei ka dukan.
La iohi ba katei ka kali kit Gas, hadien ba ka la dep ban rat ia ki briew, kali rit bad dukan, ka la kyllon ruh khram ha katei ka jaka.
Tang mar iatip halor katei ka jingjia aksiden bad khamtam ba ka dei ka kali Kit Gas, ki Pulit ka Umiam Police Station, ki la leit mar mar sha katei ka jaka da kaba rah ruh ia ka kali pynlip ding.
Ia kitei kiba la mynsaw jur, la pynkit noh mar mar sha ki jaka sumar, na ka bynta ban ioh ia ka jingsumar.
Haba pyrshang ban wad jingtip na ki Pulit, la ong ba ka daw kaba la pynlong ia katei ka jingjia, ka lah ban dei namar ka jingniah stet palat da u nongniah jong katei ka kali kit Gas bad haba u la poi ha katei ka jaka kaba kham long khongdong, um lah shuh ban tehlakam ia ka kali kaba u niah bad kaba la wanrah pat ia katei ka jingjia kaba sngewsih.
La iathuh ruh, ba kitei ki lai tylli ki kali kiba la julor, kiba kynthup ia kawei ka Wagon-R, ka Tata Nano bad Maruti Car, ki dei kiba ieng donkam harud katei ka surok.