“Don kiba byrngem ia ki bar Jylla, ha thain Iewduh”

Shillong, 27 Naitung:
Ki pulit ki la pynjur ia ka jingpahara ha ka thain Motphran bad Iew duh ban iada na kano kano ka jingjia kaba lah ban mih namar ka jingshah shoh tied ki briew ka KHADC bad ki nongthoh khubor ha ki bar jylla ha kane ka sngi Thohdieng.
“Ngi la pynjur ia ka jingpahara ha ka thain Motphran bad Iewduh”, la ong u SP (City) Bah Vivek Syiem ha kane ka sngi Saitjain. U la ong ba ki la ioh jingtip ba don ki katto katne ki briew kiba byrngem ia ki bar jylla kiba shong dukan ha Iewduh.
“Ngim nym ailad ia kano kano ka jingthmu ban pynthut ia ka suk ka sain. Ngin leh da kaba tyngeh ia kino kino kiba leh pyrshah ia ka ain”, la ong u Bah Syiem. Ha kajuh ka por, u SP (City) u la iathuh ba la kem ar ngut ki briew kynthup u Amit Pal bad u Mohammed Iftiyaq kiba donkti ban hiar thma ia ki briew ka KHADC bad ia u nongthoh khubor. Kine ki briew la kem na Barapathar, Jhalupara. Ha kajuh ka por, la pynlait noh ia 6 ngut kiba kem ha kane ka sngi Thohdieng namar ba kim donkti .
“Ia mynta, ngi la kem saw ngut kynthup u Paul Leong bad u khun jongu, u Kimfa Marbaniang,” la ong u SP (City). U Bah Syiem u la iathuh ba ki la tip ia ki katto katne ki briew kiba donkti ha ka jinghiar thma ha kane ka sngi Thohdieng. “Ngi la thwet ia ki bad ngin kem mardor”, la ong u bah Syiem. Ha kajuh ka por, ka UDP ka la pynrem jur ia ka jingshah hiar thma ki briew ka KHADC bad ki nongthoh khubor ha ki bar jylla.
“Ngi dawa ban kem mardor ia kito baroh kiba donkti ha ki kam ban hiar thma ia ki briew ka KHADC bad ki nongthoh khubor”, la ong u Joint secretary ka UDP u Bah Donkupar Sumer ha kane ka sngi Saitjain. U Bah Sumer uba dei ruh u MDC bad EM ba peit ia ka Mining bad Geology u la ong ba ka party ka ai jingkyrshan ia ka jingleh ka Executive Committee (EC) ba mynta ban kyndang trading license ia ki bar jylla katkum ka ain Trading by Non-Tribal Regulation Act, 1954.